Millətlər Liqasının 2024/25 mövsümünün pley-off mərhələsi çərçivəsində keçirilən oyunlardan ikisinin nəticəsi ölkəmizdə maraqla gözlənilirdi.

Söhbət Türkiyə - Macarıstan (3:1), Ermənistan - Gürcüstan (0:3) oyunlarından gedir. Ona görə ki, həm qardaş ölkənin, həm də şimal-qərb qonşumuzun yığması son illərdə inkişaf edir və önəmli qələbələr qazanır.

Türkiyə millisinin İstanbulda - "Rams Park"da keçirilən oyununda diqqətimi çəkən məqamlardan biri də "Qalatasaray"ın tanınmış "UltrAslan" fanklubunun açdığı pankart oldu. Yazılan şüar belə idi: "Milli komanda klubların üstüdü, üstünün ən üstüdü". Yığmaya verilən dəyəri futbol diliylə bundan daha gözəl izah etmək çətindi. İrəvanda, dəqiq desək, Vazgen Sarkisyan adına Respublika stadionunda keçirilən Qafqaz derbisində diqqətimi çəkən məqam isə əsəblərimlə oynadı. Çünki tribunalardan birində cəhənnəmə gedən "Artsax"ın "bayrağ"ı yerləşdirilmişdi. Özü də yaxınlığında olan Ermənistan bayrağından iki dəfə böyük idi. Bəllidi ki, bütün başverənlərdən nəticə çıxarmayan ermənilər təxribat törətməkdən çəkinmir.

Millimiz bu gün axşam saat 21.45-də Mehdi Hüseynzadə adına Sumqayıt şəhər stadionunda Haitiyə qarşı beynəlxalq yoldaşlıq oyunu keçirəcək. Təxmin etdiyiniz kimi, yuxarıdakılardan yığmamızın matçı ərəfəsində əbəs yerə bəhs etmirəm. Əziz Oğuz eli, biz də millimizi tək qoymamalıyıq. Bəli, yığmamız nə dünya çempionatının seçmə mərhələsi, nə də Millətlər Liqası çərçivəsində meydana çıxacaq. Adidən adi, sadədən sadə yoldaşlıq oyunudu. Fernando Santuş demişkən, qələbə qazanana xal vermirlər. Lakin hər şey burdan başlamırmı? Xəyal Əliyev, Şahin Şahniyarov, Ağadadaş Salyanski ilk dəfə milli forma geyməyəcəkmi? Yığmamız ilk dəfə Sumqayıtda meydana çıxmayacaqmı? Bəlkə elə komanda Santuşun təyinatından sonra ilk qələbəsini də qazanacaq? Bəlkə həqiqətən gələcəyin uğurlu millisinin qələbələri sıralamaqla formalaşdırılması prosesi məhz Sumqayıtdan başlayacaq? Doğrudanmı, ümidli olmağa dəyməz?! Dəyər!

Tribunaları Azərbaycan bayraqlarıyla doldurmağa, oyunboyu millimizi qələbəyə səsləməyə, tribunalarda yığmanın həqiqətən hər şeydən üstün olduğunu göstərməyə varsız?

KƏNAN BAHADIR