Misli premyer-liqasında cari mövsümün sonunda baş məşqçi ayrılığı yaşana bilər.

“Football-plus.az”ın əldə etdiyi məlumata görə, “Kəpəz”in çalışdırıcısı Azər Bağırov indiki iş yerində məmnun deyil. Bunun səbəbi isə klubun yeni sponsoru və gələcək sahibləridi.

Belə ki, Gəncə təmsilçisini himayəsinə götürən və hər ay komandaya yüksək səviyyədə maliyyə ayıran iş adamı təkcə klubun idarə edilməsinə yox, həm də baş məşqçinin səlahiyyətində olan məsələlərə qarışır. Əlbəttə, belə durum mütəxəsssisi qane etmir. Hətta baş məşqçi bəzi məğlubiyyətləri məhz yeni söz sahiblərinin yersiz müdaxilələriylə əlaqələndirir.

Yeri gəlmişkən, “Kəpəz”in “Neftçi”ni məğlub etdikdən sonra sosial şəbəkə hesablarında rəqibinə ilişməsi, lakin qısa müddətdə həmin paylaşımı silməsi də Azər Bağırovu qəzəbləndirib. Bu arada həmin paylaşımın da kluba rəhbərlik edəcəyi gözlənilən şəxslərin təzyiqiylə silindiyi iddia olunur.

Hər halda, Azər Bağırov “Kəpəz”i premyer-liqada saxlamaqda qərarlıdı. O, yalnız bundan sonra vəzifəsini tərk edəcək.

Xatırladaq ki, adı çəkilən mütəxəssis AFFA-nın U-21-ə baş məşqçi gətirmək istədiyi 4 namizəddən biridi.

KƏNAN BAHADIR