Aleksandar Mitroviçin səhhətində problem yaranıb. “Əl-Hilal”ın hücumçusu qeyri-müəyyən müddətə yaşıl meydandan kənarda qalacaq.

Səudiyyə Ərəbistanı klubunun mətbuat xidmətinin məlumatına görə, təcrübəli futbolçu bazar günü səhər saatlarında xəstəxanaya yerləşdirilib. Onun ürəyində problem olduğu aşkarlanıb. 30 yaşlı serbiyalı sürətli ürək döyüntüsünə görə müalicə alacaq. Ona tam istirahət etmək və gərginlikdən uzaq durmaq tövsiyə olunub.

Qeyd edək ki, Mitroviç “Əl-Hilal”da 2023-cü ilin yayından oynayır. O, cari mövsümdə bütün turnirlərdə 25 oyun keçirib, 21 qol vurub və 3 məhsuldar ötürmə verib.