"Bəli, təəssüf ki, gözləmədiyimiz nəticə qeydə alındı. Bunun müxtəlif səbəbləri var. Komanda yorğun görünürdü. Futbolçularımızın əksəriyyəti oruc tutur. Hamının dini inanclarına hörmətlə yanaşırıq. Bu yöndə maarifləndirici söhbətlər aparırıq. Tövsiyə edirik ki, oyun günlərində oruc tutmasınlar. Əməl edən də var, etməyən də. Həssas məsələ olduğundan başqa addım atmaq istəmirik. Həmin futbolçuları düşündüyümüz üçün məşqləri iftara yaxın saatlarda keçməyə başlamışıq ki, çox yorulmasınlar. Yenə də orqanizmdə müəyyən qədər yorğunluğun olması qaçılmazdı.

Digər məsələ hakimin qərarlarıyla bağlıdı. Azı iki penaltimiz verilmədi. Yaxşı ki, bütün epizodları, həmin anları təfsilatlı əhatə etməsə də, PFL-in çəkilişləri var. Hazırda hakimin şübhəli qərarlarıyla bağlı sübutlar toplanılır. Bazar ertəsi AFFA Hakimlər Komitəsinə təqdim edib Frank De Blekerenin dəyərləndirməsini xahiş edəcəyik. Bu matçda baş hakim olan İslam Məmmədov MOİK-lə oyunumuza da idarə etmişdi. Elə həmin oyunda verdiyi qərarlar da narazılığımıza səbəb oldu. Onun hansısa komandaya simpatiyası var, yoxsa bizi sevmir, bilmirəm... Hər halda, bizi sıxır. Çox qaranlıq məsələdi.

Başqa səbəb isə meydançamızın durumudu. Martın 5-də "Kür-Araz" stadionumuzda "Şəfa" ilə qarşılaşdı. Bizim oyuna qədər ot örtüyü istədiyimiz səviyyədə bərpa olmamışdı. Heyətimiz texnikalı futbolçulardan qurulduğundan onlar belə vəziyyətdə özünü rahat hiss edə, performansını tam göstərə bilmir. Bununla belə, rəqib autsayder komanda idi. Bəlkə də futbolçuların arxayınlaşması məğlubiyyətə səbəb oldu".

"Mövsümü ən pis halda 3-cü pillədə bitirəcəyimizə inanırıq. Futbolçuların potensialına güvənirik. Düzdü, məğlub olanda baş məşqçimiz Fərid Namazovu günahlandırırlar. Deyirlər ki, heyət seçimi yanlışdı. Buna aydınlıq gətirim ki, bəzən futbolçular ya zədəli, ya da cəzalı olduğu üçün matçı buraxır. Bəzən də sarı vərəqə limitini doldurmaq üzrə olan aparıcı futbolçuları daha prinsipial oyun üçün qoruyuruq. Növbəti matça gəlincə, çempionatda asan rəqib yoxdu. Özü də aşağı sıralarda olanlar yuxarı pillələrdə qərarlaşan komandalara qarşı daha yaxşı hazırlaşır, daha ciddi yanaşır. İnanırıq ki, ilk "üçlük"dəki mövqeyimizi möhkəmləndirəcəyik".