“Qarabağ”ın prezidenti Tahir Gözəlin “Sabah”la oyundan sonra jurnalistlərə verdiyi müsahibəni dərin təəssüf hissi ilə oxudum.

Yox, elə düşünməyin ki, orda yer alan hər sözlə bağlı nəsə xüsusi fikrim var. Tahir bəy legioner limitinin götürülməsindən narazıdı. Bu mövzu ilə bağlı futbol ictimaiyyəti ikiyə bölünüb, hər tərəfin özünə görə dəlilləri var. Kimin haqlı, kimin haqsız olduğunu tezliklə görəcəyik. Gözəl daha çox klub üçün akademiya tikə bilməməkdən şikayətlənib:

Beləliklə, ölkənin ən titullu klubu, avrokuboklardakı qüruru o boyda Suraxanıda özünə baza tikmək üçün yer tapa bilmir. Təbii ki, hər kəs indiki duruma, yəni “Qarabağ”da təsisləşmənin ləngiməsinə görə günahı klub rəhbərliyində görür. Etiraf edək ki, komanda hətta avrokubok oyunlarında uğursuzluğa düçar olanda da azərbaycanlı azarkeşlər və jurnalistər əsasən sponsorluğu boynuna götürən “Azərsun Holdinq”i və konkret Tahir bəyi suçlayır, nəinki Qurban Qurbanovu və məşqçi korpusunu. İttihamlar hətta bu nöqtəyə qədər uzanır: guya rəhbərlik transfer yönündə xəsislik edir, baş məşqçinin istədiyi futbolçuları almır.

Mənə elə gəlir ki, Tahir bəyin son müsahibəsi bu yöndəki bəzi suallara və müəmmalara aydınlıq gətirdi. Artıq hər kəsə aydındı ki, Gözəlin də imkanları sərhədsiz deyil. Bu fikri bir qədər də dəqiqləşdirək: pul xərcləmək mənasında hüdudsuz olsa da, Azərbaycandakı bürokratiyanın təməl elementlərindən olan meşin qapıları dəlib keçmək dərəcəsində güclü deyil. Yoxsa 122 kvadrat kilometr əraziyə malik, idmana yetərincə yaxın şəxs sayılan Adil Əliyevin icra başçısı olduğu rayonda niyə “Qarabağ”a baza tikmək üçün yer tapılmasın ki?! Öz aramızdı, çox böyük nonsens deyilmi? “Qarabağ” ölkəni avrokuboklarda ən yaxşı şəkildə təmsil edir, amma həmin ölkədə klubun baza tikməsi üçün yer tapılmır…

Tahir bəyin dedikləri gerçəkdisə (klub prezidentinə inanmamaq üçün heç bir əsasımız yoxdu), onda ayıbdı, özü də böyük ayıb. Özü də elə bir ayıb ki, futbolu inkişaf etdirməyin, bu yolda addımlar atmağın zəruriliyi ilə bağlı nağıllarla heç cür uyğun gəlmir. Biz jurnalistlər qarışıq hər kəs iş adamlarının futbola maraq göstərməməsindən, bu sahənin inkişafına pul ayırmaq niyyətinin yoxluğundan danışır. Amma Tahir Gözəl nümunəsi, yəni onun “hər cür investisiya qoymağa hazırıq” sözlərinin qarşısına sədd kimi çəkilən “yer yoxdu” cavabı başqa mənaya gəlir axı.

Bəli, “Qarabağ”ın ölkə daxilində qazandığı titullar, avrokuboklardakı nəticələri ilə klub infrastrukturunun yaradılması, təsisləşmə yolunda atdığı addımlar bir-birini tamamlamır, qətiyyən üst-üstə düşmür. Bu gün heyətdə klubun bir yetirməsi də yoxdu, ölkəyə gələn əcnəbiyə “Qarabağ”ın təsisləri” deyə tanıtmaq üçün normal bir məkan da tapa bilməzsiz. İndi belə aydın olur ki, bu məsələdə ciddi problem var. Həm də pul yox, münasibət ilə bağlı problem. Bu ölkədə “Qarabağ”ın adının və şöhrətinin, Tahir Gözəlin də aça bilmədiyi qapılar varsa, onda futbolun inkişafı ilə bağlı nağıllarla özümüzü aldatmayaq. Dığırlanırıq da özümüz üçün bala-bala, asta-asta, yavaş-yavaş… İndiki qarlı günlərdə balacaların parklarda yumaladığı, şişirtdiyi, sonra da öz-özünə dağılan qar topaları və qardan düzəldilən adamlar kimi…

HUŞƏNG