Srağagün "Qarabağ" Avropa Liqasının H qrupunun ilk oyununda "Molde"ni məğlub etdi - 1:0.

"Köhlən atlar"ın rəhbərliyi qələbə qazandıqları günün ertəsi media mənsublarını başına yığaraq ümumi məsələlərlə bağlı söhbətləşdi. Klubun prezidenti Tahir Gözəl "Qarabağ"ın planlarını, problemlərini dilə gətirərək jurnalistlərlə səmimi söhbət etdi. 

Media mənsubları ağdamlıların axsadığı məsələlərlə bağlı fikirlərini birbaşa "köhlən atlar"ın rəhbərinə çatdırdı. Əsas problem akademiya ilə bağlı idi ki, Tahir Gözəl burda problemləri olduğunu açıq-aşkar etiraf etdi. Klub prezidenti akademiya tikmək üçün dövlətin ən üst səviyyəli instansiyalarından torpaq sahəsi istədiklərini, amma iki ildi bu məsələnin həll olunmadığını dilə gətirdi. Maraqlıdı, məmurlar ölkənin ən titullu və avrokubok qüruru olan klubuna belə münasibət bəsləyirsə, görəsən, başqaları onların əlindən nə çəkir?!

Görüşdə Mətbuat Şurasının rəhbəri Rəşad Məcid də iştirak edirdi. Səmimi ortamda keçən tədbirdə klubun akademiyasının yaxın iki-üç il ərzində inkişaf edəcəyi də jurnalistlərin diqqətinə çatdırıldı.

İLKİN SULTANLI