Ronaldo 1000-ə Səudiyyə Ərəbistanında çatacaq
Kriştiano Ronaldonun “Əl-Nəssr” ilə müqavilə müddətini 2026-cı ilə qədər uzatdığını xəbər vermişdik.
Səudiyyə Ərəbistanı klubu ilə portuqaliyalı forvard arasındakı danışıqlar bir neçə həftə əvvəl başlamışdı. 40 yaşlı hücumçunun əvvəlki müqaviləsinin vaxtı bu ilin iyununda bitəcəkdi.
İtaliyalı jurnalist Nikolo Skiranın yazdığına görə, Ronaldonun əsas hədəfi 2026-cı ildə ABŞ, Kanada və Meksikada keçiriləcək dünya çempionatına qatılmaqdı:
“O, 2026-cı ildə də oynasa, altı müxtəlif dünya çempionatında iştirak edən ilk futbolçu kimi tarixə düşəcək”.
Kriştiano özü hələ ki DÇ-2026 ilə bağlı söhbətlərdən qaçır. Sadəcə, ötən ilin sentyabrında bu haqda düşünməyin hələ tez olduğunu demişdi:
“Özümü yaxşı hiss edirəm. Ancaq DÇ-2026 ilə bağlı suala cavab verə bilmərəm. İndiki anla yaşayıram. Millətlər Liqasında uğura nail olmağa çalışacağıq. Ancaq 2026-cı il? Ona hələ çox var”.
Kriştianonun qarşıya qoyduğu növbəti hədəf fərdi xarakter daşıyır. Özü də ambisiyalı hədəfdi. Ronaldo ötən yay “yutub” kanalında belə demişdi:
“Hədəfim 1000 qoldu. Bəlkə də 41 yaşa qədər oynayacam, ancaq bunu istəyirəm. Bircə zədələr olmasın. Və daha bir söz deyim: bütün qollarımın videosu var, odu ki, 1000 qol vurduğumu sübut edə bilərəm”.
Təbii ki, bu açıqlamanın hədəfi Peledi. Artıq dünyasını dəyişən əfsanəvi braziliyalı karyerası boyunca 1283 qol vurduğunu iddia edirdi. Ancaq bu iddianı sübut etməklə bağlı problem var – həqiqətən də hər qolun videosu yoxdu.
Ronaldo elə bu ay verdiyi müsahibədə arzulanan hədəfə can atmasını bir qədər fərqli şəkildə izah etmişdi:
“920, 925 qolla bitirsəm, bunun mənim üçün heç bir əhəmiyyəti olmayacaq. Mən tarixin ən yaxşısıyam. Nöqtə. 1000 qola çatsam, əla olacaq. Çatmasam da, yaxşıdı. Rəqəmlər yalan danışmır”.
“Əl-Nəssr”də Ronaldonun 1000-ci qolu məhz Səudiyyə Ərəbistanında vurmasını çox arzulayırlar. Klubun kommersiya direktoru Jordi Dürante “Metaratings” ilə söhbətdə belə deyib:
“Onun 1000-ci qolu məhz “Əl-Nəssr”də çıxış etdiyi dövrdə vuracağına əminəm. Bununla bağlı böyük bayram təşkil edəcəyik”.
Digər xəbərlər
