15-ci turun Liverpul derbisi təqvimdə nəzərdə tutulan vaxtdan təxminən iki ay sonra keçirildi.

David Moyes “sükan arxasına” keçəndən sonra “Everton” yaxşı sürət yığıb və artıq təhlükəli zonadan uzaqlaşıb. Həftəsonu ölkə kubokunun oyununda çempionşipin autsayderi “Plimut”a uduzan “Liverpul”un isə müəyyən psixoloji böhran yaşaması təbii idi. Üstəlik Betu da 11-cu dəqiqədə hesabı açmaqda “qırmızılar”ı şoka saldı. Ancaq şok uzun sürmədi: cəmi 5 dəqiqə sonra Makallister hesabı bərabərləşdirdi.

Ardından hissə boyunca meydanda bərabər və yetərincə sönük oyun getdi. Sadəcə, referi Maykl Oliver sarı vərəqələri sağa-sola paylamaqla (ilk yarıda bunların sayı 5 oldu) oyuna rəng qatdı. Belə görünürdü ki, komandalar heç-heçəyə razıdı. Fasilədən sonra hətta “Everton” daha fəal görünürdü. Ancaq qol imkanlarından yararlanmayan “göylər”i 73-cü dəqiqədə premyer-liqanın ən yaxşı futbolçusu Salah cəzalandırdı.

Düzdü, bu qolda misirlinin köməyinə səkən top da çatdı. Ancaq məlum olduğu kimi, bəxt də güclülərin üzünə gülür. Hər kəs düşündü ki, “Everton”un 3 oyunluq məğlubiyyətsiz seriyası qırıldı. Yeri gəlmişkən, bu, yaz-yayda söküləcək “Qudison Park”da keçirilən sonuncu Liverpul derbisi idi. Amma uzatma dəqiqələrində Tarkovski komandasını məğlubiyyətdən qurtardı. Heç-heçə çempionluq yarışında müəyyən mənada intriqanı qorudu.

Final fitindən sonra meydanda kütləvi dava-dalaş düşdü. Nəticədə meydan sahiblərindən Dukure, qonaqlardan isə Cons və baş məşqçi Arne Slot qırmızı vərəqə ilə cəzalandırıldı. İş ondadı ki, oyun bitəndən sonra Dukure “Everton”un qolunu bayram etmək üçün “Liverpul” azarkeşlərinin qərarlaşdığı tribunanı önünə qaçdı. Bu isə “qırmızılar”dan Consun xoşuna gəlmədi. Belədə əlbəyaxa olan futbolçular daha böyük davaya yol açdı. Dava yalnız hər iki komandanı məşqçi heyətinin və polisin müdaxiləsi ilə yatırıldı. Slot bu qalmaqala görə 2 oyunluq diskvalifikasiya olunub. 46 yaşlı niderlandiyalı dava vaxtı təhqiramiz ifadələr və söyüş işlədib.

O, “Vulverhempton” və “Aston Villa” ilə oyunları buraxacaq, “Mançester Siti” ilə oyunda ehtiyat oyunçular skamyasına qayıdacaq.

15-ci turdan təxirə salınan oyun
Everton – Liverpul 2:2
Betu, 11. Tarkovski, 90+8 – Makallister, 16. Salah, 73. (39280)
Liverpul: Alisson, Bredli (Cons, 61), Konate, Van Diyk, Robertson (Simikas, 69), Qravenberx (Aleksander-Arnold, 61), Makallister, Salah, Soboslai, Qakpo (Nunyes, 69), Dias (Jota, 87).
1. Liverpul – 57, 2. Arsenal – 50, 3. Nottingem Forest – 47... 14-16. Tottenhem, Everton, Vest Hem – 27...
Bombardir: Salah (Liverpul) – 22.

Faktlar
* “Liverpul” 1912-ci ildən bəri ilk dəfə start heyətində bir nəfər də olsun ingilis futbolçu olmadan meydana çıxıb. 113 il əvvəl belə hal “Liverpul”un “Arsenal”la matçında yaşanmışdı. Həmin vaxt komandanın əsas heyətində yalnız şotlandiyalı futbolçular yer almışdı.
"Everton"la görüşdə “qırmızılar”ın start heyətində 9 ölkədən futbolçular olub: Niderland - Van Diyk, Qakpo, Qravenberx, Fransa – Konate, Macarıstan – Soboslai, Şotlandiya – Robertson, Şimali İrlandiya – Bredli, Misir – Salah, Braziliya – Alisson, Argentina – Makallister, Kolumbiya – Dias.
* Salah “Everton”la səfər oyununda həm qol vurdu, həm də məhsuldar ötürmə verdi. 32 yaşlı misirli ulduz bu mövsüm 13 səfər qarşılaşmasında 13 qol və 9 məhsuldar ötürmə ilə yadda qalıb. Salah bir mövsümdə səfər oyunlarında “qol+ötürmə” sistemi üzrə 22 xal toplayan ilk futbolçu kimi premyer-liqa tarixinə düşdü. Əvvəlki rekord 1993/94 mövsümündə səfər oyunlarında “qol+ötürmə” sistemi üzrə 21 xal toplayn “Nyukasl”ın forvardı Endi Koula məxsus idi.