1/4 finalın çərşənbə günü keçirilən sonuncu oyununa hər iki komanda qarışıq heyətlə çıxmışdı.
“Football-plus.az” xəbər verir ki, qarışıq, amma əvəzedici yox! Daha möhkəm, evdə oynayan “Liverpul” dərhal təşəbbüsü ələ aldı və yarım saatın tamamında hesabı açdı. Soboslainin uzaqdan zərbəsi dəqiq alındı. Fasilədən az sonra Cons iti bucaq altından qonaqların qapısına 2-ci topu göndərdi. Bundan sonra “çəkicdöyənlər”in müdafiə xətti tez-tez “çat verməyə” başladı. Onların qələbəyə inamı tam itdi. Dəyişikliklər də qonaqların oyununu gücləndirmədi və sona 20 dəqiqə qalmış Qakpo 3-cü qolu vurdu. Bouen nadir əks-hücumların birində fərqi azaltsa da, Salah tezliklə 3 top fərqini bərpa etdi. 85-ci dəqiqədə dubl edən Cons isə yekun hesabı müəyyənləşdirdi. Yalnız 5:1-dən sonra “Liverpul” tempi bir qədər aşağı saldı. “Qırmızılar”ı tituldan cəmi iki addım ayırır. “Vest Hem” isə azarkeşlərini açıq-aşkar məyus etdi.

Artıq yarımfinalın püşkü də atılıb. Bu mərhələdə “Midlsbro” “Çelsi”, “Liverpul” isə “Fulhem” ilə qarşılaşacaq. İlk oyunlar yanvarın 8-də, cavab görüşləri 22-də keçiriləcək.

1/4 final
Liverpul - Vest Hem 5:1
Soboslai, 28. Cons, 56; 85. Qakpo, 71. Salah, 82 – Bouen, 77.
Liverpul: Kelleher, Qomes, Kuansa, Van Diyk (Konate, 60), Simikas (Bredli, 69), Endo (Aleksander-Arnold, 60), Cons, Soboslai (Salah, 60), Elliott, Qakpo (Dias, 78), Nunyes.
Vest Hem: Areolya, Soufal (Kerer, 72), Mavropanos, Oqbonna, Conson, Souçek, Alvares (İnqz, 81), Kudus (Uord-Prouz, 72), Fornals, Benrahma (Paketa, 58), Bouen.
Bu mərhələnin ilk üç oyunu çərşənbə axşamı keçirilib: Çelsi - Nyukasl 1:1, p. – 4:2, Everton - Fulhem 1:1, p. – 6:7, Portveyl (D-3) - Midlsbro (D-2) 0:3.

Oyundan sonra
Yürgen Klopp, “Liverpul”un baş məşqçisi: “Oyun, qol vuranların siyahısı, nəticə, eləcə də meydanda komanda oyununu yaradan fərdi hərəkətlər xoşuma gəldi. Oyunun əvvəlindən sona qədər möhtəşəm təsir bağışladıq. İrəlidə çox oyun var, uşaqlar da xeyli oyun keçirib, hər birimiz üçün çətindi. Futbolçularımız yorulmadan çalışdı, həm də müəyyən məqamlarda şən futboldan ləzzət aldı. Bunu görmək çox xoşdu”.