''Liverpul'' bu mövsüm zəif nəticələri ilə fanatlarını üzməkdə davam edir.

Yürgen Kloppun komandası dünən premyer-liqanın 22-ci turunda ''Vulverhempton'' səfərindən 0:3 hesablı acınacaqlı məğlubiyyətlə döndü. Özü də ilk 12 dəqiqədə 2 top buraxdı. Hazırda qələbəsiz seriyası 4 oyuna çatan ''Liverpul'' 20 oyuna 29 xal toplayıb və lider ''Arsenal''dan 21 xal geridə olmaqla 10-cu pillədə qərarlaşıb! Məsələ o həddə çatıb ki, ''tvitter''də #KloppOut heşteqi dünən trendə çevrildi. Fanatlar artıq ciddi şəkildə məhşur məşqçinin işindən narazıdı. Klopp oyundan sonra çox məyus görünürdü və baş verənlərə izah tapa bilmədi. O, ilk 15 dəqiqədəki oyuna görə oyunçularını tənqid etdi. ''Qırmızılar''ın 2023-də 7 rəsmi oyunda cəmi 1 qələbəsi var. ''Liverpul'' premyer-liqa çərçivəsində ardıcıl 3-cü səfər oyununda 3 top buraxdı. Buna qədər ''Brentford'' (1:3) və ''Brayton''la (0:3) oyunda da eyni hal təkrarlanmışdı. Bu cür uğursuz seriya sonuncu dəfə 1993-ün noyabr-dekabrında yaşanmışdı! Onu da bildirək ki, ''Liverpul'' 2015-dən, yəni Klopp komandanın başına keçdikdən bu yana ilk dəfə premyer-liqada ardıcıl 3 səfər oyununda məğlubiyyət acısı yaşadı. Qarşıda isə komandanı ''Everton''a qarşı ev derbisi gözləyir.