"Səbail" Misli premyer-liqasının 24-cü turu çərçivəsində "Araz-Naxçıvan"ın meydanından bir xalla ayrıldı - 0:0.

"Football-plus.az" xəbər verir ki, "dənizçilər"in baş məşqçisi Cavid Hüseynov oyunsonrası mətbuat konfransında jurnalistlərin suallarını cavabladı.

- Oyun haqda çox danışmağa ehtiyac yoxdu. İlk hissədə daha yaxşı çıxış etdik. Qapımızın önündə cəmi bir təhlükəli epizod yaşandı. Həm hücum, həm də müdafiə planında daha yaxşı idik. İkinci hissədə rəqibin öz meydanında irəli atılacağını, özünü daha yaxşı tərəfdən göstərmək istəyəcəyini bilirdik. Buna baxmayaraq, yaxşı oynadıq. Qələbə üçün gəlsək də, bir xalla kifayətləndik. Nəticə qənaətbəxşdi. Oyunumuzda inkişaf var. Çox gərgin mübarizə gedir. Çalışacağıq ki, növbəti oyunlarda daha yaxşı çıxış edək.

- Növbəti turda "Şamaxı"yla qarşılaşacaqsız. Həmin matçda qol vurmalısız. Bu oyuna necə hazırlaşacaqsız?
- Əvvəlki matçlarda qollar vurmuşuq. Bunu problem saymıram. Həm "Sabah", həm də "Araz-Naxçıvan" çox yaxşı rəqiblərdi. "Şamaxı"yla oyuna da eyni cür yanaşırıq. İstəyim futbolçularımın inkişaf etməsi, planları taktiki baxımdan düzgün yerinə yetirməsidi. Qarşıda hələ 12 tur var. Növbəti matç bizim üçün final oyunu deyil.

- Hücum mövqeyiylə bağlı fikirləriniz necədi?
- Təəssüf ki, heyətimiz geniş deyil. Gözlədiyimiz transferlər alınmadı. İndi bunun səbəbləri haqda danışmaq istəmirəm. Heyəti formalaşdırmaqda çətinlik çəkirəm. Məşqçilər məni daha yaxşı anlayar. Məşqlərimiz süni ot örtüklü meydançalarda baş tutur. Belədə zədələr üzə çıxır. Bu gün Nşuti zədəli idi. Amma Fəridin oyununu bəyəndim. Onun yoxluğunu hiss etdirmədi. Mənə elə gəlir ki, layiqincə oynadı. İstənilən halda, yolumuza davam etməliyik.

KƏNAN BAHADIR