"Səbail" Misli premyer-liqasının evdə keçirilən 16-cı tur matçında "Araz-Naxçıvan"a uduzdu - 0:2.

"Football-plus.az" xəbər verir ki, "dənizçilər"in baş məşqçisi Cavid Hüseynov oyunsonrası mətbuat konfransında jurnalistlərin suallarını cavabladı.

- "Araz-Naxçıvan"ı təbrik edirəm. Oyuna yaxşı hazırlaşsaq da , uduzduq. Komanda şəklində üzgünük. Nəyisə dəyişmək istəsək də, alınmır. Hücum xəttində problem var. Səbrli olmalıyıq. Maksimum dərəcədə toparlanmalıyıq. Son iki oyun qalıb. Əlimizdən gələbi edəcəyik ki, həmin matçlarda yaxşı nəticə əldə edək.

- "Səbail" Şahin Diniyevin dövründə də uduzurdu. Amma heç olmasa, qol vururdu, xal qazanırdı. Siz üç rəsmi matçda nə qol vura bilmisiz, nə də xal qazanmısız. Kimdi günahkar? Futbolçular, Diniyev yoxsa Hüseynov?
- Təkrar olacaq, amma heyətimiz geniş deyil. Zədəli futbolçularımız da var. Bəli, komandanı üç oyuna çıxarmışam. Bu gün "Qarabağ"la mübarizə aparmaq çox çətindi. "Sabah"a da uduzduq. "Araz-Naxçıvan" isə formada olan iki komandadan biridi. Yenə deyirəm ki, çalışırıq, amma alınmır.

- Problem heyətin kasad olmasındadı? Lazımi büdcə ayrılmayıb?
- Komandada sırf hücumçu yoxdu. Halbuki hər mövqe üçün iki futbolçu olmalıdı. Bizdə bəzi mövqelərdə əvəzləyici oyunçular da yoxdu. Futbolçular arasında rəqabət aşağı səviyyədədi. Qış fasiləsinə qədər başqa şansımız yoxdu.

- Bəs, komanda fasilədə gücləndirilməsə, erkən ayrılığınız mümkündümü?
- Bu barədə danışaq hələ tezdi. Ümid edirəm ki, istədiyimiz futbolçuları ala biləcəyik.

- Özünüz özünüzü necə motivasiya edirsiz?
- Durumdan xəbərdaram. Bura gələndə hər şeyi bilirdim. Bir qələbə kifayət edər ki, komandanın özünəinamı qayıtsın. Rəqiblər kifayət qədər güclüdü. Amma inamımız itməyib.

- "Şamaxı"yla matç dönüş nöqtəsi ola bilərmi?
- Hər rəqib bizim üçün eyni səviyyədədi. Çox istəyirik ki, qələbə qazanaq. Sonuncu pillədəyik. Təzyiq var. Futbolçular narahatdı. Bizi "Şamaxı"yla çətin oyun gözləyir.

KƏNAN BAHADIR