Vuppertal şəhər məhkəməsi “Formula-1” yarışlarının yeddiqat qalibi, hazırda yataq xəstəsi olan Mihael Şumaherin ailəsini şantaj edən 53 yaşlı kişini 3 illiyə azadlıqdan məhrum edib.

"Football-plus.az"ın xəbərinə görə, istintaq nəticəsində məlum olub ki, Şumaherin təhlükəsizlik xidmətinin sabiq əməkdaşı 1500-ə yaxın foto və videonun surətini çıxararaq şantajçıya satıb. Həmin 53 yaşlı kişi isə oğlu ilə birgə Şumaherin İsveçrədə olan ailəsinə zəng edərək pul istəyib. İttiham aktında göstərilir ki, həmin şəxs əlindəki materialları internetdə yayacağı ilə bağlı təhdid altında Şumaherin ailəsindən 15 milyon avro tələb edib.

Yayda bu üç şəxs həbs olunub. Ardından şantajçı və oğlu günahını boynuna alıb, təhlükəsizlik xidmətinin sabiq əməkdaşı isə cinayətdə iştirakını qəbul etməyib. Məhkəmə sonda şantajçının oğluna 6 aylıq, təhlükəsizlik xidmətinin əməkdaşına isə 2 illik şərti cəza kəsib.