Türkiyədə yanvarın 13-dən etibarən açıq olan qış transfer dönəminə fevralın 11-də rəsmən yekun vuruldu.

"Football-plus.az" xəbər verir ki, qardaş ölkədə budəfəki “pəncərə” çox hərəkətli keçdi. 19 superliqa klubundan 5-i – “Samsunspor”, “Antalyaspor”, “Kayserispor”, “Hatayspor” və “Adana Dəmirspor”un transfer cəzası davam etdiyindən onlar heyəti yeni futbolçularla gücləndirə bilmədilər. Yerdə qalan 14 klub 25-i xaricdən, 33-ü Türkiyə daxilindən olmaqla ümumilikdə 58 transfer reallaşdırdı.

Ən fəal klublar heyətini 7 futbolçu ilə gücləndirən “Qalatasaray”la “Kayserispor” oldu. “Fənərbaxça”, “Qalatasaray” və “Qaziantep” xaricdən ən çox (hərəyə 4) futbolçu transfer edən klublardı.

Ümumilikdə bu qış superliqaya gələn 58 futbolçudan 31-i yerli, 27-si əcnəbidi. Əcnəbilərdən ən çox braziliyalılar və ukraynalılar (hərəyə 3) transfer edildi.

Bundan başqa, 58 yeni futbolçunun orta yaş həddi 25,2-yə bərabərdi. Onların arasında ən yaşlı isim “Vesterlo”dan “Kasımpaşa”ya gələn 36 yaşlı qapıçı Sinan Bolat, ən gənci isə “İndependiente”dən “Beşiktaş”a gələn və 19 yaşını tamamlayan ekvadorlu vinger Keni Arroyodu. 27 əcnəbi futbolçunun 26-sı ölkə xaricindən transfer edilib. Türkiyə daxilində isə bir klubdan digərinə keçən yeganə əcnəbi “Trabzonspor”dan “Bodrum”a yollanan makedoniyalı Enis Bardi oldu.

Qeyd edək ki, “Qalatasaray”ın bu qış reallaşdırdığı 7 transfer üçün klub büdcəsindən ümumilikdə 27 milyon avro çıxacaq. Bu, qış “pəncərəsi” üçün “sarı-qırmızılar”ın yeni rekordudu. “Fənərbaxça”da rəsmi şəkildə açıqlanan məbləğ 16,7 milyon avrodu. Bunun 10 milyonu Dieqo Karlosa, 6,7 milyonu Mimoviçə ödənilib. Şkrinyar və Talişka üçün ödənilən məbləğ klub tərəfindən açıqlanmayıb. Şkrinyar onsuz da icarəyə götürülüb.

Bu arada “Fənər”də 14 nəfərlik legioner limiti dolu olduğundan yeni transfer Mimoviçin mövsümün sonuna qədər “Zenit”ə icarəyə verildiyini bildirək. “Beşiktaş” isə iki gənc oyunçu – Arroyo ilə Rikardoya görə ümumilikdə 7,61 milyon avro ödəyəcək. Sonda nəhənglərin həm yeni transferlərinin, həm də ayrılanların tam siyahısını təqdim edirik.

QALATASARAY
Gələnlər: Karlos Kuesta (Genk), Alvaro Morata (Milan), Ahmed Kutucu (Eyüpspor), Ərən Elmalı (Trabzonspor), Mario Lemina (Vulverhempton), Pşemislav Frankovski (Lans), Arda Ünyay (Ankaragücü).
Gedənlər: Mişi Batşuayi (Ayntraxt F), Viktor Nelsson (Roma), Hakim Ziyeş (Əl-Duhail), Ərən Aydın (Sarıyer), Batuhan Şən (Kocaelispor).

FƏNƏRBAXÇA
Gələnlər: Talişka (Əl-Nəssr), Dieqo Karlos (Aston Villa), Milan Şkrinyar (PSJ), Oqnen Mimoviç (Srvena Zvezda).
Gedənlər: Samet Akaydın (Çaykur Rizəspor), Bartuğ Elmaz (Maribor), Oqnen Mimoviç (Zenit).

BEŞİKTAŞ
Gələnlər: Keni Arroyo (İndependiente), Elan Rikardo (La Ekidad), Əmir Haciahmetoviç (Konyaspor).
Gedənlər: Əl Musrati (Braqa), Can Keleş (Kasımpaşa), Jan Onana (Cenoa), Şer Ndur (Fiorentina).

TRABZONSPOR
Gələnlər: Daniel Sikan, Aleksandr Zubkov (hər ikisi “Şaxtyor”), Tim Jabol Folkarelli (Ayaçço), Mustafa Eskihellaç (Qaziantep).
Gedənlər: Ərən Elmalı (Qalatasaray), Umut Günəş (İstanbul BŞ), Enis Bardi (Bodrum), Umut Bozok (Eyüpspor), Poyraz Yıldırım (Ümraniyəspor), Borna Barişiç (Leqanes), Sərkan Asan (İğdır).