Türkiyəli hakim Səudiyyə Ərəbistanında oyun idarə edəcək

Tanınmış türkiyəli hakim Xəlil Umut Meler həftəsonunu Səudiyyə Ərəbistanında keçirəcək.

Belə ki, FİFA dərəcəli təcrübəli hakim şənbə günü Səudiyyə Ərəbistanı çempionatının 12-ci turunun mərkəzi oyununa - ''Əl-Şabab'' - ''Əl-Hilal'' matçına dəvət alıb. Həm Türkiyə Futbol Federasiyası, həm də Hakimlər Komitəsi bu xüsusi dəvəti müsbət qarşılayıb və Meleri Səudiyyə Ərəbistanına göndərməyə razılıq verib.

Oyun paytaxt Ər-Riyadda keçiriləcək və Bakı vaxtı ilə saat 21.00-da başlayacaq. Melerin köməkçiləri Kərəm Ərsoy və İbrahim Çağlar Uyarcan olacaqsa, VAR hakimi funksiyasını almaniyalı Bastian Dankert icra edəcək. Son çempion ''Əl-Hilal'' ötən tur mövsümdə ilk dəfə uduzmaqla liderliyi əldən verdi və hazırda 28 xalla ikinci pillədə qərarlaşıb. ''Əl-Şabab'' isə 22 xalla 4-cü pillədədi.

Qeyd edək ki, Səudiyyə Ərəbistanında mərkəzi oyunlara əcnəbi hakimlərin dəvət olunması prkatikasından tez-tez istifadə edilir.

ƏLİ