Küveytdə keçirilən Körfəz Millətləri Kubokunda finalçılar bəlli olub. Dekabrın 31-də Oman Səudiyyə Ərəbistanı ilə, Bəhreyn Küveyt ilə qarşılaşıb.

''Football-plus.az'' xəbər verir ki, ilk oyunu türkiyəli Xəlil Umut Meler idarə edib. Onun idarə etdiyi bir çox oyunlarda olduğu kimi bu dəfə də qalmaqalsız ötüşməyib.

Oman 34-cü dəqiqədə azlıqda qalmasına baxmayaraq 74 və 85-ci dəqiqələrdə vurduğu qollarla 2 topluq üstünlük yaxalayıb. Aşkar favorit sayılan Səudiyyə Ərəbistanı uzun müddət azlıqda oynayan rəqibə qarşı yalnız son anlarda fərqi minimuma endirməyə müvəffəq olub. Final fiti ərəfəsində Səudiyyə Ərəbistanı da meydanda azlıqda qalıb.

Oyun bitən kimi Səudiyyə Ərəbistanının baş məşqçisi Erve Renar Melerin yanına qaçaraq ona narazılığını bildirib. Bundan başqa fransalı mütəxəssis oyunsonrası mətbuat konfransında Melerin yüksək səviyyəli hakim olmadığını vurğulayıb.

Qeyd edək ki, bir müddət öncə bu ədalət təmsilçisinin Səudiyyə Ərəbistanı çempionatında idarə etdiyi qarşılaşma da müzakirələrə səbəb olmuşdu. ''Əl-Hilal''ın səfərdə ''Əl-Şabab''ı 2:1 məğlub etdiyi oyunda da Meler hər iki komandadan bir futbolçunu qovmuşdu. Həmin vaxt ''Əl-Şabab''ı çalışdıran Vitor Pereyra da oyundan sonra türkiyəlini yıxıb sürümüşdü. Sonradan Səudiyyə Ərəbistanı Futbol Federasiyası oyundakı hakim səhvləri ilə bağlı açıqlama vermiş və bundan sonra çempionat oyunlarına türkiyəli hakimlərin dəvət olunmayacağını açıqlamışdı.

Digər yarımfinalda Bəhreyn Küveyti minimal hesabla yenib. Yanvarın 4-də baş tutacaq finalda Oman ilə Bəhreyn üz-üzə gələcək.

ƏLİ