''Fənərbaxça''nın yeni transfer Oqnen Mimoviçin yeni klubuna aydınlıq gəlmək üzrədi.

''Football-plus.az'' xəbər verir ki, serbiyalı sağ cinah müdafiəçisi böyük ehtimalla ikinci dövrəni ''Zenit''də keçirəcək. Klublar arasında artıq anlaşma əldə olunub. Keçid icarə əsasında baş tutacaq. Rusiya çempionunun Mimoviçi birdəfəlik transfer etmək hüququ yoxdu. Yəni bu oyunçu istənilən halda mövsüm bitən kimi Türkiyəyə qayıdacaq.

Yağız Sabuncuoğlunun paylaşdığı məlumata görə Mimoviç artıq tibbi müayinədən keçmək üçün Dubaya yollanıb. Rusiya çempionatında qış fasiləsi davam edir və ''Zenit'' də hazırda Dubayda toplanışdadı.

Xatırladaq ki, ''Fənər'' Mimoviçi yanvarda 6,7 milyon avroya transfer edib. 4,5 illik müqavilə imzalanan bu futbolçu üçün hətta lisenziya da çıxarılmışdı. Amma sonradan məlum oldu ki, legioner limiti üzündən bu oyunçuya komandada yer tapılmır. ''Fənər'' ya Sən-Maksimenin ''Napoli''yə yollanacağını, ya da yeni müqavilə imzalamaq istəməyən Osayi-Samuelin adının iştirak ərizəsindən çıxarılacağını düşünürdü. Amma bu variantların heç biri baş tutmadı.

Osayi-Samuel müqaviləsinin son mövsümündə olmasına rəğmən rəhbərliyi yaya qədər komandaya canla-başla xidmət edəcəyinə inandıra bildi. Həm də onunla yeni müqavilə ilə bağlı danışıqlar mövsümün sonuna qədər davam etdiriləcək. Sen-Maksimenin isə ''Napoli''yə keçidi son anda alınmadı.

Hazırda Mimoviç ilə birlikdə ''Fənər''in heyətində 17 legioner var. Türkiyə Futbol Federasiyası mövsümlük iştirak ərizəsinə maksimum 14 legionerin yazılmasına imkan verir. Bekao ilə Oostervolde zatən mövsümü başa vurub və onların müqaviləsi dondurulub. Mimoviçin də ayrılmasından sonra komandada legionerlərin sayı 14-ə enəcək.

ƏLİ