"Neftçi" Misli premyer-liqasının 22-ci tur matçında "Zirə"nin meydanından qalib ayrıldı - 2:1.

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavabladı.

- Start heyətində 7 yerli futbolçu var idi. "Neftçi" ruhunun qayıtmasında bu amilin böyük rolu varmı?
- Bəli var, amma böyük deyil. Dəfələrlə legionerlərin azı yerli oyunçular qədər çalışdığına, işinə can yandırdığına şahidlik etmişəm. Əsas iş komandaya bu ruhu ötürməkdən başlayır. Belədə həm yerli, həm də əcnəbi futbolçu əlindən gələni əsirgəməyəcək. İndiyə qədər çalışdığım klublarda legionerlər yerli futbolçulardan geri qalmayıb. Ab-havanı düzəltmək lazımdı.

- "Kəpəz"lə kubok matçını da saysaq, son üç oyunda üç qələbə qazanmısız. Martın 22-si demişdiz, bəlkə...
- Bəli, martın 22-si demişdim, ancaq hansı ildə olduğunu deməmişdim (gülür). Gözləyək.

- Dramatik sonluğu necə şərh edə bilərsiz?
- Təbii ki, bütün komandalar meydana qalib gəlmək üçün çıxır. Komanda istəkli oynayırsa, deməli, yaxşı olacaq. Bu, bizim üçün həmin oyunlardan idi. Qələbə qazanmaq üçün hər şeyi etdik. Qol buraxandan sonra pərişan olsaq da, ümidimiz ölmədi. Bütün enerjimi qələbə üçün sərf etmişdim. Köməkçilərimə dedim ki, qismət budu. Qələbə mənim üçün xoşdu.

- Sambu və yeni transfer haqda fikriniz necedi? Komandaya fadalı ola biləcəklərinə inanırsızmı?
- Qışda oyunçu almaq çətin prosesdi. Bəzi futbolçularla ddekabrdan bəri danışıq aparırdıq. Sözün əsl mənasında, klublarına çökmüşdük. Əfsuslar olsun ki, alınmadı. Bizi narahat edən məqamlardan biri də hücum planında əvvəldən axıra qədər eyni tempdə oynamamağımız idi. Bu matçın son dəqiqələrində belə bəxtimizi sınamaqdan əl çəkmədik. Düşündük ki, gücümüzdən istifadə etməliyik.

- İndi qələbəni qeyd edəcəksiz, yoxsa fasilə yoxdu?
- Hamı bir nəfər kimi bazaya gedir. Prosedurlarımız var. Vaxtımız azdı. Kubok matçları da bizim üçün çox vacibdi. Hazırlaşmağa davam etməliyik. Psixoloji vəziyyətimizi yaxşılaşdırdıq. Ardıcıl üç qələbəni böyük iş kimi görürlər, amma bizim qrafikimiz var. Addımları buna uyğun atmalıyıq.

- "Qarabağ"la matçda da əvvəlki ruhunu xatırladan "Neftçi"ni görə biləcəyikmi? Bu dəfə Azərbaycan derbisində fərqli nəticə qeydə alına bilərmi?
- Bu matçlardan sonra həm siz media nümayəndələri, həm də azarkeşlərin Azərbaycan derbisi haqda belə danışması normaldı. Bəli, "Qarabağ" bizdən güclüdü. Öz evimizdə oynayacağıq. Yaxşı nəticə arzu edirik. Bu üzdən, meydanda hər şeyi edəcəyik. Hər halda, indi qələbəmizdən danışaq. Dərhal "Qarabağ"la matça köklənməyək.

KƏNAN BAHADIR