"Şamaxı" Misli premyer-liqasının evdə keçirilən 5-ci tur matçında "Neftçi"ylə heç-heçə etdi - 0:0.

"Football-plus.az" xəbər verir ki, "şirlər"in baş məşqçisi Ayxan Abbasov matçdan sonra keçirilən mətbuat konfransında jurnalistlərin suallarını cavablayıb.

- Nəhayət ki, Şamaxıda, azarkeşlərimizin qarşısında oynaya bildik. Matç gözlədiyimdən daha sürətli keçdi. Bilinirdi ki, hər iki komanda qalib gəlmək istəyir. Futbolçularımdan razı qaldım. Qalibiyyətə layiq idik. Sadəcə, hücumlarda son nöqtəni qoymağa vaxt çatmadı. Yenə də ümidliyik. Qısa vaxtda bunu bacarmışıqsa, daha yaxşı ola bilərik. Milli fasilədən səmərəli istifadə etmək istəyirik. Daha yaxşı olmağa çalışacağıq.

- Yeni transferlər olacaqmı? Demişdiz ki, hələ pulumuz var.
- Pulumuz qurtarıb (gülür), amma yeni futbolçular almağa çalışacağıq.

- Dördüncü hakimə nəyə görə etiraz edirdiniz?
- Köməkçi məşqçimiz ayaq üstə durduğuna görə sarı vərəqə ilə cəzalandırıldı. Sanki dördüncü hakimlər oyunlara hərb disiplini ilə gəlir.

- Çempionat başlayanda gözlənilirdi ki, "Şamaxı" premyer-liqanı tərk etməmək uğrunda mübarizə aparacaq. Amma komanda iddialıdı. Bu durumu necə dəyərləndirirsiz?
- Bizim kimi komandalar sona qədər mübarizə aparmalıdı. Böyümək üçün premyer-liqada qalmalısan. Yoxsa, planlar alt-üst olacaq. Bunu təmin etdikdən sonra vəziyyəti dəyərləndirəcəyik. Hər şey büdcə deyil. Çempionatımız sürprizləri sevir.

- Bilindiyi kimi, tərəfdarlar tribunada "12-ci oyunçu" rolunu oynayır. Şamaxılılar bunu bacardımı?
- Əlbəttə. Evdə ilk oyunumuz idi. Azarkeşlər sonadək komandanın yanında oldu. Düşünürəm ki, qarşıdakı oyunlarda əldə olunacaq sərfəli nəticələrlə onları daha çox sevindirəcəyik.

- Roman Qriqorçukla duellərinizi xatırlayırsınız?
- Bəli.

- 7-ci duelinizdi və mütləq bərabərlik var. 5 oyunda heç-heçə, qalan iki oyunda isə hərəyə 2:1 hesabıyla qələbə qeydə alınıb.
- Bunu bilmirdim (gülür).

- "Turan Tovuz"da çalışanda da "Sabah", "Neftçi" və "Zirə" kimi komandalardan xal alırdız. "Şamaxı"yla da bunu bacarırsız. Bu, sizinlə bağlıdı yoxsa futbolçular iddialı komandalara qarşı daha yaxşı çıxış edir?
- Bizdə yerli məşqçilərin işinə o qədər də qiymət verilmir. Yəqin ki, əcnəbi mütəxəssis olsa, başqa cür deyilərdi. Gördüyümüz iş asan deyil. Bu gün tək mən yox, premyer-liqadakı bütün yerli məşqçilər əziyyət çəkir. Amma lazım olan dəstək yoxdu. Klublarımızın idarəedilməsində böyük problemlər var. 1-ci liqadan gələn komandaya qısa vaxtda legioner gətirmək, komanda qurmaq kənardan asan görünsə də, belə deyil. Burda tək mənim yox, bütün məşqçilərin və mənə inanan rəhbərliyin əməyi var. Ümumiyyətlə, rəhbərlik inansa, məşqçi işləyə bilər. Əks halda, nəticə olmayacaq.

KƏNAN BAHADIR