"Zirə" Misli premyer-liqasının evdə keçirilən 22-ci tur matçında "Neftçi"yə uduzdu - 1:2.

"Football-plus.az" xəbər verir ki, "qartallar"ın baş məşqçisi Rəşad Sadıqov oyunsonrası mətbuat konfransında jurnalistlərin suallarını cavabladı.

- Ağır və çoxsaylı mübarizələri olan matç izlədik. Oyunun əksəriyyəti meydanın mərkəzində keçdi. 75-ci dəqiqədən sona qol vurmağa yaxın olan komanda biz idik. Standart vəziyyətlərin davamında qollar buraxdıq. Biri duran topdan, ikincisi cinah asmasından... Rəqibi təbrik edirəm. Başımızı dik tutmalıyıq. Ağır və acı məğlubiyyətdi. 0:1 hesabıyla uduzsaq, belə ağır olmazdı... Futbolçularıma mübariz oyun tərzinə görə təşəkkür edirəm. 

- “Zirə qış fasiləsindən sonra rəqib tanımırdı. “Neftçi”yə isə iki oyunda da uduzmusuz. Bu məsələdə Samir Abasov - Rəşad Sadıqov amilini qabartmaq olar? 
- Futbolda hansısa rəqibə prinsipial yanaşmaq normaldı. 4-5 ildi burdayam. "Neftçi" bizə qarşı həmişə prinsipial olub. Birinci dövrədə 2:0 qalib gəldiyimiz matç bir qədər rahat keçmişdi. Həmin vaxt "Neftçi"nin performansı çox aşağı idi. İki il bundan əvvəl - Samir Abasovun dönəmində baş verən hadisəni xatırladım. "Neftçi"ni məğlub etsək, üçüncü olacaqdıq. Amma onların ikinci sıradakı mövqeyi dəyişməyəcəkdi. Həmin oyun belə çox prinsipial keçdi. Hətta sonradan hakimliklə bağlı şikayətləndilər. Yəqin ki, "Zirə"yə qarşı oyunlar maraqlı keçir.

- Prinsipiallığın əsas səbəbi Rəşad Sadıqovun adı və soyadı ola bilər?
- Düşünmürəm. Bəlkə də "Neftçi"nin futbolçularının 90 faizi məni tanımır. Nəsil dəyişir. Legionerlər gəlib-gedir. Belə məqamlar bizi daha da gücləndirməlidi. 90-cı dəqiqəyə qədər qələbəyə yaxın biz idik. Ədalətli nəticə qolsuz heç-heçə idi. Avrokuboklardan bu yana xeyli belə qol buraxmışıq. Hesabı bərabərləşdirsək də, qoruyub-saxlaya bilmədik.

- Eldar Quliyev son vaxtlar oynamır. Səbəb nədi?
- Bakıda virus yayılanda o da möhkəm xəstələndi. Hərarəti 15-20 gün yüksək oldu. Zədəlilərimiz var. Davit Volkov qışda xəstələnib, hələ tam sağalmayıb. Hücum xəttində narahatlıq yaşayırıq.

KƏNAN BAHADIR