"Zirə" ölkə kubokunun 1/4 final mərhələsinin ilk oyununda "Araz-Naxçıvan”a məğlub oldu - 0:1.

"Football-plus.az" xəbər verir ki, "qartallar"ın baş məşqçisi Rəşad Sadıqov oyunsonrası mətbuat konfransında jurnalistlərin suallarını cavabladı.

- Kubok oyununa uyğun matç keçdi. Hər iki komanda mübarizə apardı. Küləkli hava şəraiti də futbolçulara mane olurdu. İkinci hissədə qapımıza penalti təyin edildi. Başqa qol epizodu xatırlamıram. Biz də epizodlara girə bilmədik.

- “Zirə” üçün ikinci oyun daha ağır olacaqmı?
- İlk olaraq, rəqib hesabda irəlidədi. Nəzərə almalıyıq ki, “Araz-Naxçıvan” çempionatda az qol buraxıb, etibarlı oynamağı bacarırlar. İstəyirik ki, mərhələni keçən tərəf biz olaq. Cavab matçından sonra “Turan Tovuz”la səfər oyunu var.

- Son 2-3 gündü Salifu Sumanın xarici klublarla danışıq apardığı deyilir…
- Tək Salifuya yox, bir neçə futbolçumuza təkliflər var. Rəsmi də var, rəsmi olmayan, maraqlananlar da. Hansı klublar olduğunu açıqlamayacam. Amma rəsmi təklif də gəlib. Biz də Salifu ilə söhbət etdik, müqaviləsini artırdıq. Onun və bizim xeyrimizə olan qərar qəbul etdik. Klubumuz hər zaman təklifə açıqdı. Vacib olan odu ki, bizdən gedən oyunçu inkişaf etsin. Təkliflər futbolun bir hissəsidi. Suma bizimlədi, yenə də ciddi təklif olsa, götür-qoy edərik.

ƏSƏD SEYİDOV