Türkiyə kubokunda qrup mərhələsinin 2-ci turunda səfərdə ''Kocaelispor''u 2 cavabsız qolla məğlub edərək ilk xallarını qazanan ''Sivasspor'' şok bir qərarla üzləşib.

Türkiyə Futbol Federasiyasının nəzdində fəaliyyət göstərən Nizam-İntizam Komitəsinin qərarı ilə həmin oyunun nəticəsi ləğv edilib və ''Sivasspor''a 0:3 hesablı texniki məğlubiyyət verilib! Məsələ burasındadı ki, sözügedən oyunda ikinci hissədə meydana çıxan ''Sivasspor''lu Murat Palulinin oynamaq icazəsi yox imiş. 30 yaşlı müdafiəçi superliqanın son turunda ''Eyüpspor''la səfər matçının (0:1) 85-ci dəqiqəsində qırmızı vərəqə almışdı.

Düzdü, Türkiyə futbolunda qırmızı vərəqə hansı turnirdə göstərilirsə, futbolçu da cəzasını həmin turnirdə çəkir. Yəni superliqadakı vərəqələr kuboka, kubokdakı vərəqələr isə superliqaya şamil edilmir. Sadəcə Murat qırmızı vərəqə zamanı qaydalardan kənar hərəkətinə görə tədbirli olaraq NİK-ə sövq edilmişdi.

Tədbirli sövq zamanı cəza açıqlanana qədər futbolçunun meydana çıxmaq hüququ yoxdu! Görünür, ''Sivasspor'' rəhbərliyi bunu unudubmuş. Beləliklə, ''yiğidolar''ın 3 xalı alınaraq ''Kocaelispor''a verilib. Sivas təmsilçisi 2 turdan sonra 0 xalla öz qrupunda sonuncu pilləyə yuvarlanıb. ''Kocaelispor'' isə xalını 3-ə yüksəldərək sonuncu pillədən birbaşa 3-cü pilləyə yüksəlib.

ƏLİ