"Zirə" Misli premyer-liqasının 11-ci turunda "Araz-Naxçıvan"ın meydanında bir xal qazandı - 1:1.

"Football-plus.az" xəbər verir ki, "qartallar"ın baş məşqçisi Rəşad Sadıqov oyunsonrası mətbuat konfransında jurnalistlərin suallarını cavabladı.

- Meydanda yüksək yerlər uğrunda mübarizə aparan komandaların amansız mübarizəsinə şahidlik etdik. Hər iki tərəf qələbəyə köklənmişdi. Oyun bizim üçün çox yaxşı keçirdi. Hesabda öndəydik. Təhlükəli hücumlarla qol epizodları yaradırdıq. Əks-hücumlardan istifadə edib ikinci qolu vurmaq lazım idi ki, bu bizdə alınmadı. Belə hallarda hansısa kiçik səhv nəticəyə təsir edə bilər. Rəqibin qapımıza zərbəsi olmadığı, cərimə meydançası daxilinə ötürmə etmədiyi halda penalti təyin edildi və qol buraxdıq. Qismət belə imiş. Komandamın göstərdiyi oyundan, əzmkar mübarizəsindən razı qaldım. Qələbə üçün əlimizdən gələni etdik. Hətta hesab bərabərləşdikdən sonra da hücum edən tərəf biz idik. Üç xalı daha çox istəyirdik. Əfsuslar olsun ki, bunu bacarmadıq. "Araz-Naxçıvan" kimi komandanın meydanından 1 xalla qayıtmaq da pis nəticə deyil.

- Sanki Fuad Bayramovun performansı sizi razı salmadı. Hansı tapşırığınızı yerinə yetirmədi?
- Ümumən mübarizə aparırdı. Lakin 1-ci hissədə xeyli top itkisinə yol verdi. Uzun müddət idi start heyətində oynamırdı. Ola bilsin, bir az oyun formasından düşüb. Hərəkətli və istəkli çıxış etdi, amma topla daha diqqətli davranmalıdı.

- Penalti epizodunu necə şərh edə bilərsiz? Etiraz edirdiz...
- Bəli, narazı qaldım. Bəlkə də oyun qaydalarına əsasən haqlı qərardı. Amma xeyrimə belə penaltinin verilməsini istəmərəm. Nə qapıya zərbə var, nə də cərimə meydançasının daxilinə ötürmə... Həmin epizodda heç bir təhlükə yox idi. Onsuz da top qapıçının əlinə gedirdi.

- Üç turdu qələbə qazana bilmirsiz. Bu, avrokuboklardan qalan yorğunluqla bağlıdı?
- Məsələnin avrokuboklara aidiyyatı yoxdu. Bu sualla razı deyiləm. Həmin vaxtdan bəri neçə ay keçib. Həmçinin indiyə qədər qələbələr qazanmışıq. Xal itirdiyimiz oyunlara nəzər yetirək. "Turan Tovuz"a uduzduğumuz matçda azı altı yüzfaizlik qol vəziyyəti yaratmışıq. Bunu az sayda komandalar bacarır. "Sabah"ın gücü, ustalığı bəllidi. Həmin matçda 1 xal qazandıq. Bu gün isə qələbəyə layiq idik. Səbrli olmalıyıq. Sadəcə, inkişaf etməliyik. Oyun tərzimizi nəticəyə yansıtmalıyıq.

KƏNAN BAHADIR