“Formula-1” üzrə dünya çempionatının yeddiqat qalibi Lüis Hemilton Barselonadakı test yürüşlərinin 2-ci günündə qəzaya uğrayıb.

“Motorsport”un yaydığı xəbərə görə, idarəçiliyi itirən britaniyalı pilot səhər sessiyası zamanı trassın kənarındakı qoruyucu səddə çırpılıb. Hemilton “Ferrari”nin 2023-cü ilə aid SF-23 modelinin yenilənmiş versiyasının sükanı arxasında olub.

İdmançı özü qəza zamanı zərər görməsə də, maşın faktiki sıradan çıxıb. “Ferrari”nin hazırda hadisəni araşdırdığı bildirilir.

Hemilton yanvarın 22-də Fyoranodakı trassda da “Ferrari”ni sınaqdan keçirmiş, onda heç bir problemlə üzləşməmişdi. Onun ötən mövsünüb sonunda “Mersedes”i “Ferrari”yə dəyişdiyini də xatırladaq.

Hemiltonun qəzası üzündən “Ferrari”nin digər pilotu Şarl Lekler də test yürüşlərini həyata keçirə bilməyib. Bir qədər əvvəl vurğuladığımız kimi, SF-23 maşını ciddi ziyan görüb.