"Sumqayıt" Misli premyer-liqasının evdə keçirilən 21-ci tur matçında "Araz-Naxçıvan"la heç-heçə etdi - 0:0.

"Football-plus.az" xəbər verir ki, "kimyaçılar"ın baş məşqçisi Vaqif Cavadov oyunsonrası mətbuat konfransında jurnalistlərin suallarını cavabladı.

- Yaxşı oyun keçirdik. Hər iki hissədə gərgin mübarizəyə şahidlik etdik. İlk yarı üstünlüyümüz şəraitində keçdi. Təəssüf ki, penaltidən yararlana bilmədik. Amma "Araz-Naxçıvan" kimi komandadan bir xal qoparmaq da yaxşıdı. İkinci pillədədilər. Elmar Baxşıyev möhkəm komanda formalaşdırıb. Komandama bu cür rəqiblə oyunda belə oyun nümayiş etdirdiyinə görə alqış düşür. Qalib gələ bilmədiyimizə görə üzgünük. Qələbələr bizi gözləyir. Belə oyun tərziylə qalib gəlmək şansımız daha çoxdu. Məncə, hər iki komandanın xal qazanması ədalətli oldu.

- Dediyiniz kimi, oyuna yaxşı başladız. Bəs, sonra nə dəyişdi?
- "Araz-Naxçıvan"ın ikinci pillədə qərarlaşması təsadüfi deyil. Sonradan meydana çıxan futbolçular da öz sözünü deyir. Biz də adi komanda deyilik. Bunu dəfələrlə sübut etmişik. Düzdü, indi altıncı pillədəyik, lakin hər şey dəyişə bilər. İnanıram ki, istədiyimiz nəticələri əldə edəcəyik.

- "Sumqayıt" beş oyundu ki, qol vura bilmir...
- Bu sualı eşidəcəyimi bilirdim. Futbolda belə termin var: qol vura bilmirsənsə, buraxma. Xallar qazanırıq. Çalışacağıq ki, növbəti matçda qalib gələk. Gücümüz olmasaydı, 90 dəqiqə ərzində hücumlar qura bilməzdik. Oyunlar bir-birindən fərqlənir. Bəzən rəqib səni yorulmağa məcbur edir. Həmişə qələbə qazanmaq istəyirik. Futbolçularım hər xalın nə qədər dəyərli olduğunu dərk edir. Evdə dominant futbol oynadıq. Düzdü, nəticə istədiyimiz kimi olmadı, lakin bu cür rəqiblərlə mübarizədə bir xal məni qane edir.

- Tresor Mossi ilə münaqişə yaşadız. Əvəzetməni sürətlə reallaşdırmaq istəsəz də, 7-8 dəqiqədə gözləməli olduz. Nə baş vermişdi?
- Diqqətinizdən nəsə yayınmır (gülür). Bəli, futbolçunu meydana buraxmaq istəsəm də, yavaş-yavaş gəldi. Bəlkə də onu anlamaq olar. Biz də vaxtilə futbolçu olmuşuq. Hamımız istəmişik ki, şans qazanaq. Hər halda, bütün futbolçular komandaya kömək etməli, baş məşqçisi çağıranda dərhal gəlməlidi. Bu, hamıya aiddi. Nə qədər şans qazandığından asılı olmayaraq, qaydalara əməl etməlisən. Mossiylə danışdıq. İnanıram ki, bir də belə hal təkrarlanmayacaq.

- Yeni transferləriniz Ronaldo Vaskes və Momo Yansane haqda nə düşünürsüz? Hansı durumdadılar?
- Ronaldo düşərgədədi. Tibbi yoxlanışdan keçib. Hər şey qaydasındadı. Sadəcə, oyunlarda iştirak edə bilməsi üçün PFL-in təsdiqi lazımdı. Hələ qurumdan lazım olan vərəqə gəlməyib. Bu üzdən, adını iştirak ərizəsinə sala bilmədik. Momoya gəlincə, oyunlar göstərir ki, yaxşı futbolçudu. Bir qədər zamana ehtiyacı var. İlk iki oyunda təcrübəli olduğunu hiss etdirib. Məncə, yaxşı hücumçudu.

KƏNAN BAHADIR