Ötən yay “Liverpul”un baş məşqçi vəzifəsindən ayrılan Yürgen Kloppun hansı komandanın başına keçəcəyi maraq doğururdu. Lakin o, uğurlarla zəngin olan karyerasında fasilə verməyi lazım bildi.

"Football-plus az" xəbər verir ki, çox keçmədən “Red Bull” şirkətinin futbol bölməsinin rəhbəri təyin olunan 57 yaşlı alman mütəxəssisin məşqçilik sənətindən böyük ölçüdə əl çəkdiyi məlum oldu. İndi geri boylanaraq Kloppun son yarım ildə nə etdiyinə göz gəzdirək.

* Çempionlar Liqasının finalında (ÇL) “Borussiya”ya azarkeşlik edib. Əlbəttə, sabiq komandasının “Real”a qarşı mövsümün ən vacib oyununu buraxa bilməzdi. Əslində onu matçı göstərən TV-yə ekspert kimi dəvət etmişdilər, lakin Klopp dortmundlulara tribunadan azarkeşlik etməyə üstünlük verib. Və bu seçiminə görə “Uembli”yə toplaşanların böyük alğışını qazanıb.

* Teylor Sviftin konsertinə gedib. İyunun ortalarında tamaşaçı kimi “Enfild”ə qayıdıb. Həyat yoldaşı məşhur müğənninin dünya turu üçün ona da bilet alıb. Yürgen “Liverpul”un ev oyunlarını keçirdiyi stadionun VIP-lojasında doyunca şənlənib.

* Tennis turnirinə yollanıb. Dünya şöhrətli mütəxəssis yay tətilini Malyorkada keçirib. Onun orda 3,5 milyon funt sterlinqə aldığı malikanə var. Almaniyalı bir müddət əvvəl “Bild” qəzetinə açıqlamasında “həmişə cənubda evimin olmasını arzulamışam” demişdi. Liverpulu tərk edəndən sonra günəşli məkana yollanan Klopp orda Almaniya yığmasının formasında tennis turnirinin finalında görünüb.

* AÇ-2024-ün finalına tamaşa edib. O, ölkəsində keçirilən qitə çempionatının son matçını buraxa bilərdi? Təbii ki, yox! Berlinə yollanmaqla ispaniyalı Lamin Yamal və oyundaşlarının qələbəsini izləmək imkanı qazanıb.

* Məşqçilik karyerasının başa çatdığına işarə vurub. Kloppun adı İngiltərə və ABŞ yığmaları ilə birgə hallanırdı. Amma hər iki varianta “yox” deyib. Bu komandaların başına keçməyə razılıq verəcəyi halda simasını itirəcəyini dilə gətirib. Jurnalistlərə açıqlamasında “hələ ki karyeramı başa vurmuşam, bu, böyük qərar idi. Amma ola bilsin, bu barədə bir neçə aydan sonra danışaq ” deməklə artıq böyük ölçüdə məşqçilik həyatının sona çatdığını da bildirib.

* Paralimpiadaya yollanıb. Avqustda Parisdə olub. Bu şəhərə badminton üzrə Yeni Zelandiya yığmasının üzvü olan dostu – almaniyalı paraatlet Voytek Çiji dəstələmək üçün gedib. Tribunada fəal azarkeşliyi ilə diqqəti cəlb edən Klopp Paralimpiya Oyunlarının əhəmiyyətindən də danışıb.

* “Borussiya”nın əfsanələri” komandasına məşq keçib. Onun daha bir böyük dönüşü sentyabra təsadüf edib. “Borussiya”nın məşqçi kostyumunu yenidən geyən Klopp komandaya Yakub Blaşikovski ilə Lukaş Pişçekin “Siqnal İduna Park”da təşkil edilən vida mərasimində başçılıq edib.

* “Red Bull” şirkətində işə cəlb olunub. Bu xəbər oktyabrın əvvəlində yayılıb. Amma əksər almaniyalı azarkeşlər onun təyinatını “Leyptsiq”in məlum imicinə görə heç də isti qarşılamayıb. Bu baxımdan Kloppun sabiq komandaları “Maynts-05” və “Borussiya”nın (Dortmund) tərəfdarları daha kəskin etiraz ediblər. Məşqçi üçün heç də arzulanan hal deyil…

* Dağda xizək sürüb. O, “Liverpul”dan ayrılandan sonra sosial şəbəkələrdə fəallığı ilə seçilib. Hətta izləyiciləri üçün sual-cavab sessiyası da təşkil edib. Amma dekabrda Alp dağlarına yollanmağa üstünlük verib: sadəcə, istirahət edib, dağda xizək sürüb və Miladı bayram edib. Bir sözlə, “Boxing Day” həyəcanından tam uzaq olub!

* Yenidən Parisdə görünüb. 2025-ci il onun üçün yenidən Fransaya səfərlə başlayıb. Liqa 2-də keçirilən matçlardan birini izləyənlər arasında görünüb. Bunda əsas məqsədi payızda “Red Bull” ailəsinə üzv kimi qəbul edilən “Paris”in (PSJ ilə səhv salmayın – red.) işləri ilə yaxından tanış olmaq idi. Paytaxt komandası onun diqqətli baxışları altında “Amyen”ə qalib gəlməklə yenidən 1-ci pilləyə yüksəlib. Bu, şirkətin futbol bölməsinin rəhbərinin ictimaiyyət içinə ilk rəsmi çıxışı idi. Beləliklə, herr Yürgen artıq yeni işinin başındadı!