Bilindiyi kimi, Yürgen Klopp mövsümün sonunda “Liverpul”un baş məşqçi vəzifəsini tərk edəcək. Maraqlıdı ki, onun komandadan ayrılandan sonra tikinti işləri ilə məşğul olacağı bildirilir.

Bu barədə “Daily Express” məlumat yayıb. Amma alman mütəxəssisin özünü inşaatçı kimi sınayacağını düşünməyin.

Məsələ ondadı ki, Klopp iki yeni obyekt tikdirir. Onlardan biri vətəni Visbadendə, Maynts yaxınlığındadı. O, həm də Malyorkada (İspaniya) ev inşa etdirir. Çünki Belear adaları onun sevimli istirahət məkanıdı. “Daily Express”in yazdığına görə, indiyədək Kloppun Almaniyadakı evinin tikinti işlərinə həyat yoldaşı Ulla nəzarət edib. Lakin məşqçi mövsümün sonunda “Liverpul”dan ayrılacaq və bütün tikinti işlərinin nəzarətini öz üzərinə götürəcək. Səbəb bu prosesin qrafikdən xeyli geri qalması ilə bağlıdı. 56 yaşlı çalışdırıcının bir müddət məşqçilik fəaliyyətinə fasilə verəcəyi də bildirilir.