Bilindiyi kimi, Yürgen Klopp mövsümün sonunda “Liverpul”u tərk edəcək. Artıq onun yerini Arne Slotun tutacağı da böyük ölçüdə məlumdu.

İngiltərə klubu bu haqda rəsmi məlumat verməsə də, bir neçə gün əvvəl əksər mənbələr alman mütəxəssisə Slotun xələf olacağını vurğulayıb. Klubların hər halda mövsümün sonunu gözlədiyi aydındı. Maraqlıdı ki, hazırda “Feyenoord”u çalışdıran niderlandlı məşqçinin Liverpulda məhz Kloppun evində yaşayacağı məlum olub. Bu xəbəri yayan “Mirror” qəzeti Mersisayd qraflığındakı 4 milyon funt sterlinq dəyərində olan Formbi malikanəsinin yaxınlığında yük avtomobillərinin göründüyünü qeyd edib. Bu, Kloppun artıq köçməyə başladığını göstərir.

Bu villa “Liverpul”a məxsusdu. Klub rəhbərliyi Formbini komandanın sabiq çalışdırıcısı Brendan Rocersdən alıb. Hazırda “Seltik”ə başçılıq edən mütəxəssis isə villanı komandanın əfsanəvi futbolçusu Stiven Cerrard satmışdı.