"Kəpəz" Misli premyer-liqasının evdə keçirilən 16-cı tur matçında böyükhesablı məğlubiyyətlə üzləşdi - 0:4.

"Football-plus.az" xəbər verir ki, "sarı-göylər"in baş məşqçisi Azər Bağırov oyunsonrası mətbuat konfransında jurnalistlərin suallarını cavabladı.

- Mənə elə gəlir ki, azı 1-2 qol vurmalıydıq. Təhlükəli epizodlar yaratdıq. Hakimin qərarsızlığı oyunumuza yaxşı təsir göstərmədi. Üzücü oyun oldu. Matça yaxşı hazırlaşmışdıq. "Zirə"ni təbrik edirəm.

- Ehtiramla bağlı epizodu izlədinizmi?
- Bəli, baxmışam. Zəif komandalara qarşı qərar qəbul ediləndə düz olur. Amma büdcəsi yaxşı olan kollektivlərə qarşı daha diqqətli davranılır. Bu haqda çox danışmaq istəmirəm.

- Paçunun zədələnərək meydanı tərk etməsi nəticəyə təsir etdimi?
- Yox, belə düşünmürəm.

- Lassananın mövqeyiylə bağlı nə düşünürsüz?
- Önəmli olan futbolçuların anlaşmasıdı. Öndə Lassana, arxasında Orxan olsun istəyirik.

- Komanda 9-cu pillədədi. Nəyi dəyişmək istəyirsiz ki, azı bu pillədə qalasız?
- Gücləndirməli olduğumuz mövqelər var. Bu haqda danışmaq üçün hələ tezdi. Qarşıdakı iki oyun çox vacibdi.

- Komandanı premyer-liqada saxlamaq sizin üçün uğur sayılacaq? Yoxsa, özünüzə daha yüksək pillələri hədəf qoymusuz?
- "Kəpəz" Azərdən ibarət deyil. Biz komandayıq. Daha çox çalışmalı və daha yüksək pillələrdə qərarlaşmağa çalışmalıyıq. O başqa məsələ ki, məqsədimiz premyer-liqada qalmaqdı.

KƏNAN BAHADIR