FKSB sabah Avropa Liqasının əsas mərhələsinin 7-ci tur matçında “Qarabağ”ın qonağı olacaq.

"Football-plus.az" xəbər verir ki, FKSB-nin baş məşqçisi Elias Xaralambous Tofiq Bəhramov adına Respublika stadionunda keçirilən oyunöncəsi mətbuat konfransında iştirak edib. O, sözə belə başlayıb:

- Əvvəlcə sözlərimə başsağlığı ilə başlamaq istəyirəm. “Qarabağ”da çox əhəmiyyətli bir şəxs (fəxri prezident Abdolbari Gözəli nəzərdə tutur – red.) həyatını itirib. Biz bilirik ki, oyun çətin olacaq. Baxmayaraq ki, “Qarabağ” layiq olduğu xalları toplaya bilməyib. “Qarabağ”ın Avropada yetərincə təcrübəsi var. Biz çətin oyuna köklənmişik. Komanda və baş məşqçi təcrübəlidi.

- Mental və psixoloji baxımdan vəziyyət necədi?
- Statistikaya baxsaq, komandam çox yaxşı vəziyyətdədi. Yaxşı vəziyyəti stadionda nümayiş etdirməyə çalışacağıq.

- Bu oyun nə dərəcədə əhəmiyyətlıidi?
- Təbii ki bizim üçün çox vacibdi. Sabahkı oyuna çox ciddi yanaşırıq. Ehtiyatlı olmalıyıq və ehtiyatı əldən verməməliyik. Hansısa komandanın sonucu yerlərdə olması bizi rahatlatmamalıdı.

- “Qarabağ”ın oyunçusu Juninyo Brazilya klubuna transfer olundu. Yəqin ki Juninyonun oyunlarını izləyibsiz. “Qarabağ”da hansı hücumçunun problemər yaradacağını düşünürsüz? Taktikada dəyişikliklər varmı?
- Mənə elə gəlir ki, bu bizə təsir etməyəcək. “Qarabağ”da alternativ oyunçular var. Bizdə də itkilər var.

- Klubun sahibi Cici Bekali bu oyun üçün start heyətini açıqlayıb. Baş məşqçi olaraq, klub rəhbərinin heyəti açıqlamasını nə dərəcədə etik sayırsız?
- Hər kəsin fərqli yanaşmaları var. Düz və ya səhv olduğunu müzakirə etmirik. Bu dəfə ola bilsin ki, klub prezidenti bu siyahını açıqlayıb. Bu sabahkı oyunun nəticəsinə təsir etməyəcək.

- Rəqibin baş məşqçisi 16-17 ildi bu postdadı. Siz də bu müddətdə komandanın başında qalmaq istəyərsizmi?
- Sabaha təminat yoxdu. Niyə də olmasın?! Allah qismət etsə, bu zaman ərzində qalmaq istəyərəm.

ƏSƏD SEYİDOV