Böyük Britaniya futboluna ağır itki üz verib. Şotlandiya yığmasının sabiq hücumçusu Denis Lou vəfat edib.

"Football-plus.az" xəbər verir ki, əsasən “Mançester Yunayted”dəki parlaq çıxışı ilə məşhurluq qazanan Lou yanvarın 17-də 84 yaşında dünyasını dəyişib. İngiltərə klubunun məlumatında “ürək ağrısı ilə elan edirik ki, Denis Lou vəfat edib. O, yaşamaq üçün çox mübarizə apardı, amma nəhayət, indi rahatlıq tapdı. Biz insanların onu nə qədər dəstəklədiyini və sevdiyini bilirik” qeyd edilib.

Lou MY-də 1962-73-cü illərdə çıxış edib. Bu komanda ilə iki dəfə İngiltərə çempionu olub, bir dəfə İngiltərə kubokunu, iki dəfə İngiltərə superkubokunu qazanıb, 1968-ci ildə Çempionlar Kubokunun (indiki Çempionlar Liqası) qalibi olub. 1964-cü ildə “Qızıl top” mükafatını qazanıb. Şotlandiyalı futbolçu karyerası ərzində həmçinin “Haddersfild” (1956-60), “Mançester Siti” (1960-61, 1973-74) və “Torino”da (1961-62) da çıxış edib. MY-nin formasında 404 oyuna 237 qol vuran şotlandiyalı klubun ən yaxşı bombardirlərinin siyahısında 3-cü yeri tutur. Onun indiyədək “Yunayted”in bir mövsüm ərzində ən çox qol vuran oyunçusu olduğunu da vurğulayaq. Denis bu rekorda 1963/64 mövsümündə bütün turnirlərdə qapılara 46 dəfə yol tapmaqla nail olub.

Şotlandiya yığmasında 55 oyuna 30 qol vuran Lou 2002-ci ildə futboldakı xidmətlərinə görə İngiltərə Futbolunun Şöhrət Zalına daxil edilib.