''Fənərbaxça''nın planlarına daxil olmayan iki futbolçunun aqibətinə aydınlıq gəlib.

''Football-plus.az'' xəbər verir ki, söhbət Linkoln Enrike ilə Əmir Ortakayadan gedir. ''Fənər''ə 2022-nin yayında gələn braziliyalı Linkoln ötən mövsümün qış fasiləsində vətəninə yollanmışdı. ''Sambaçı'' ''Braqantino''da icarə əsasında bir il keçirdikdən sonra İstanbula qayıtmışdı. Amma Joze Mourinyonun planlarına daxil olmayan 26 yaşlı öz səhifəsində klub və fanatlarla vidalaşıb. Linkoln karyerasını ''Fənər''in vitse-prezidenti Acun Ilıcalının sahibi olduğu çempionşip təmsilçisi ''Hall Siti''də davam etdirəcək. Bu futbolçu cümə günü İngiltərəyə yollanaraq tibbi müayinədən keçib. Ona görə də icarə əsasında baş tutacaq bu keçidin ən qısa müddətdə rəsmən açıqlanacağı gözlənilir. Braziliyalı futbolçu ''Fənər''də 36 rəsmi oyunda iştirak edərək aktivinə 3 qol, 9 məhsuldar ötürmə yazmışdısa, ''Braqantino''da 49 oyuna çıxaraq 5 qol, 4 məhsuldar ötürmə ilə fərqləndi.

Ötən yay Belçika təmsilçisi ''Vesterlo''ya icarəyə verilən, amma burda ümidləri doğrulda bilməyərək müqaviləsi ləğv edilən və geri göndərilən Əmir Ortakayanın da yeni klubu bəlli olub. Maraqlıdı ki, 20 yaşlı müdafiəçi son anda 1-ci liqa təmsilçisi ''Ankaragücü''yə keçməkdən imtina edərək yenidən Belçikaya yollanmağa üstünlük verib. Bu dəfə o, icarə əsasında ''Beersxot''a keçib. Artıq klublar arasında anlaşma əldə olunub. Bu futbolçunun maaşını ''Fənərbaxça'' ödəməkdə davam edəcək. Qeyd edək ki, ''Beersxot''u 2023-cü ildən bu yana ''Fənərbaxça'' və Niderland yığmasının sabiq üzvü Dirk Kuyt çalışdırır. O, bu kollektivi elitaya yüksəltməyi bacarıb. ''Fənərbaxça'' rəhbərliyi ilə münasibətləri yaxşı olan Kuyt İstanbul nəhəngindən daha bir futbolçu - Bartuğ Elmazı da komandasına cəlb etmək istəyir. Joze Mourinyonun çox da şans vermədiyi 21 yaşlı Bartuğ bu mövsüm cəmi 4 rəsmi oyuna çıxaraq 1 qol vurub.

ƏLİ