Lam böyük turnirləri Avropaya qaytarmağa çağırdı - “Yaxşı ki Olimpiya Oyunları və Avropa çempionatı bizdə keçirilir”
FİFA dekabrın əvvəlində dünya çempionatının təşkilatçılığını payladı. 2030-cu ildə turnir İspaniya, Portuqaliya və Mərakeşdə (yubileyin şərəfinə Argentina, Uruqvay və Paraqvay da hərəyə bir oyun alıb), 2034-cü ildə isə Səudiyyə Ərəbistanında keçiriləcək.
"Football-plus.az" xəbər verir ki, birinci seçim təşkilatçı ölkələrin sayına (tarixdə ilk dəfə 6) görə bir qədər qorxunc mənzərə yaratdısa, ikinci seçimə görə məmurlar etik məsələlərlə bağlı suallarla üzləşib.
Dünyanın nəhəng turnirlərini Yaxın Şərqdəki monarxiya rejimlərinə imici yumaq, xilasedici vasitə kimi verməklə bağlı mübahisələr çoxdan gedir. Xüsusən də Avropada. Vaxtilə Qətər ciddi tənqid olunurdu (ağzını ovcu ilə qapayan Almaniya yığmasının oyunçularını xatırlayırsızmı?), belə aqibət Səudiyyə Ərəbistanından da yan keçmədi. Belə seçimə görə FİFA çox ciddi şəkildə qınanır.
Qınayanlardan biri də Filipp Lamdı. “Bavariya”nın əfsanəsi indi də Avropa futbolunda və Avropada sonuncu adam deyil – kitablar yazır, BMT ilə əməkdaşlıq edir, bəzi nəhəng xeyriyyə fondlarına rəhbərlik edir. Almaniyada keçirilən AÇ-2024-ün təşkilat komitəsinə də rəhbərlik edirdi, böyük məsuliyyətin altına girmişdi. Odu ki, Lamın futbol məsələləri ilə bağlı fikirlərini dinləmək ən azı cəlbedicidi. Bəs o nə deyir?
“Blickpunkt Sport” telekanalına müsahibə verən Filippun fikirləri: “Sonuncu dünya çempionatları Rusiyada və Qətərdə keçirilib. Avropa buna görə əziyyət çəkdi”. Lamın fikrincə, Rusiyada keçirilən DÇ-2018 və Qətərdə keçirilən DÇ-2022 avropalılara ziyan vurub.
Söhbət hansı ziyandan gedir? “Bavariya”nın əfsanəsi bu məqamı konkretləşdirməsə də, hər şey aydındı. Lamın elə həmin müsahibədə yer alan digər fikirlərinə görə, FİFA son illərdə “düzgün olmayan” ölkələrin səsinə cavab verir, Avropa qitəsinin isə maraqları tapdalanır. Filipp hesab edir ki, məhz bu səbəbdən AÇ-2024 və Parisdə keçirilən Olimpiada xüsusi xarakter daşıyıb. Funksionerin fikrincə, Almaniya işin öhdəsindən əla gəlib:
“Ümumilikdə biz yenidən adamları birləşdirmək üçün turnir keçirdik. Və mən düşünürəm ki, bunu yaxşı, çox yaxşı bacardıq. Həmrəylik təkcə Almaniyada yox, bütün dünyada aparıcı ideya oldu”.
Və əlbəttə, Rusiya ilə Qətər pisdisə, onda Səudiyyə Ərəbistanı da pisdi. Lam dünya çempionatının təşkilatçılığının növbəti Yaxın Şərq monarxiyasına verilməsini tənqid edib: “Bəli, bu ölkə regionda ən yüksək əhali sıxlığına malikdi: 36 milyon adam. Onlar futbolla yaxından maraqlanır. Ancaq biz klub idmanında demokratiyaya öyrəşmişik, Səudiyyə Ərəbistanında isə bu yoxdu”.
Lamın konkret nəyi – ölkədə demokratiyanın yoxluğunu və ya DÇ-2034-ün təşkilatçısının seçimini – nəzərdə tutduğu bilinmir. Məhz elə bu iki məqam ilə bağlı Səudiyyə Ərəbistanına ünvanlanası suallar (xatırladaq ki, FİFA-nın səsverməsində bu ölkənin rəqibi yox idi) var. Filipp də bu sualları verir:
“Bizim bir başqasına səs vermək imkanımız yox idi: yalnız “hə” və ya “yox” deyə bilərdik. Bu isə mənim üçün o anlama gəlir ki, nəsə qaydasında deyil”.
Almaniyalı funksioner həmçinin Avropanı birləşməyə çağırıb ki, FİFA-nı nəzarət altında saxlamaq mümkün olsun:
“Avropa birlikdə olmalıdı. Biz böyük ölkələrik. Yaxşı ki Olimpiya Oyunları və Avropa çempionatı bizdə keçirilir. Əlbəttə, istənilən ölkə bunlara iddia edə bilər... Ancaq yerlərdə şərtlərə və siyasi vəziyyətə baxmaq lazımdı. Bu, hədsiz vacib amildi”.
Avropa futbolunda ictimai fikir qəribə şəkildə inkişaf edir. Lam çox nüfizlu adamdı və böyük turnirlərin Avropaya qayıtmalı olduğunu, onları “düzgün olmayan” ölkələrə verməməyin zəruriliyini deyirsə, nəsə bilir... Biz isə növbəti dəfə məşhur və artıq çoxdan ölən “idman siyasətdan kənardı” mifinin aradan qalxdığını görürük.
Digər xəbərlər
