“Flamenqo” Juninyo üçün daha maraqlı variantdı” – o, “Sevilya”ya niyə “yox” dedi?
Məlum olduğu kimi, “Qarabağ”ın futbolçusu Juninyo “Sevilya”dan aldığı təklifdən imtina etdi və üzünü Braziliya klubu “Flamenqo”ya çevirdi.
Hazırda İspaniya mətbuatı oyunçunun Əndəlüs təmsilçisini pis vəziyyətdə qoyduğu haqda yazılar tirajlamaqdadı. Onsuz da reallığın bir adı var: Juninyo La Liqa kimi perspektivli çempionatda çıxış etmək şansını dəyərləndirmək istəmədi. İspaniya nəşrlərinin sözlərinə inansaq, “Flamenqo”nun üçqat maaş və aparıcı oyunçu kimi daha çox forma şansı qazanmaq təklifinə yönəldi.
“Football-plus.az” qeyd olunanlar haqda ən dəqiq məlumatları öyrənmək məqsədilə menecer Tural Əsgərliyə müraciət etdi. Onun cavabı:
“Juninyonun birdən-birə fikrini dəyişdiyini desək, yanılarıq. O, hələ də təklifləri götür-qoy edirdi. Mətbuatda yazılanlara inansaq, futbolçu prinsipcə “Sevilya”nın təklifini müsbət dəyərləndirmək istəyirdi. Görünür, “Flamenqo”nun təklifi daha cəlbedici olub. Hücumçunun Braziliya klubuna keçib-keçməyəcəyi haqda fikir bildirmək üçün hələ tezdi. Danışıqlar olmalıdı. Klublar da müəyyən məsələlərdə razılığa gəlməlidi. Hər halda, belə keçidlərdə son sözü futbolçu deyir. Juninyo istəmədikcə “Qarabağ” onu hansısa kluba sata bilməz. Klub yalnız futbolçunu satıb-satmamaq haqda qərar verə bilər. Komanda seçimi məhz futbolçudan asılıdı. İndi hər şey şərtlərdən asılıdı. O bəllidi ki, “Flamenqo” Juninyo üçün daha maraqlı variantdı. Təbii ki, başqa seçim olmasa, futbolçu “Sevilya”ya “yox” deməzdi”.
KƏNAN BAHADIR
