Juninyonun son bir ayda yaşadıqları və yaşatdıqları sərlövhəyə çıxardığımız fikrin həqiqət olduğunu bir daha sübut etdi!

Bəli, braziliyalı futbolçuların ipinin üstünə odun yığmaq olmaz! Onlar dəyişkən əhval-ruhiyyəyə malikdi, çox tez-tez fikir dəyişir, səni gözləmədiyin anda yarıyolda qoyurlar. Hətta dünya futbolunda artıq daşlaşan bir ehkam da var: çoxlu braziliyalının eyni komandada olması xeyir yox, ziyan verir!

Sən Allah, Juninyo dünənə qədər nə deyirdi?! Bəs ən böyük çağırışla üz-üzəyəm, karyeramda bir daha belə şans ələ düşməyəcək, bağ belə, bostan belə, “Sevilya bərbəri” operası belə, La Liqa elə... Sonda nə oldu? Hər şeyin razılaşdırıldığı, Fabritsio Romani kimi dünyaca məşhur insayder anlaşmanın detallarını ortaya qoyduğu məqamda “Flamenqo” araya girdi, Juninyonu “Sevilya”dan oğurladı. Pul braziliyalı qəhrəmanımızın gözünü tutdu, ağlını aldı, vətənini təmsil edən klubun qolları arasına saldı. Bəs karyera, bəs tərəqqi, bəs “böyük beşliy”in cazibəsi ilə bağlı nağıllar, bəs Çempionlar Liqasının qrupunda oynamaq arzusu? “Flamenqo” “Sevilya”dan üçqat artıq maaş təklif edən kimi Juninyo çaşdı və Braziliya klubuna tərəf aşdı. Şəxsən mən istər-istəməz düşünməli oluram: bəlkə elə Juninyoya hadisələrin belə axarı lazım idi, bəlkə o, transfer söhbətlərinin lap əvvəlində ürəyində qərar vermişdi ki, kim ayağımın altına çox pul töksə, onu da seçəcəm?!

İstənilən halda, yazıqlar olsun! Onsuz da “Real”, “Barselona” və ya “Atletiko” səviyyəsinə yüksəlməyəcəkdi. Sadəcə, “Qarabağ” və Azərbaycan futbolu dünyanın ən yaxşı liqalarından birində əla reklam olunacaqdı. Bu da belə getdi... Bu da pula qurban getdi... Ey Pul, sən necə də güclüsən!

ORXAN