Premyer-liqada “Liverpul”un qarşısına çıxan yoxdu.

Üstəlik “qırmızılar”ın əsas rəqibləri də müntəzəm xal itirir. Mançester nəhəngləri 18-ci turda da büdrədi. Hələ Londonun nəhəngləri – “Çelsi” ilə “Tottenhem” də onların sırasına qoşuldu. Paytaxtın bir başqa nəhəngi – “Arsenal” turun dünən axşam keçirilən son oyununda “İpsviç”i məğlub etməklə “zadəganlar”ı turnir cədvəlində arxada qoydu.

“Boxing Day”in start matçında “Mançester Siti” növbəti dəfə azarkeşlərini məyus etdi. “Şəhərlilər” evdə “Everton”a qalib gələ bilmədi. Düzdü, Qvardiolanın komandası çempionatda ardıcıl iki məğlubiyyətdən sonra 1 xal qazandı. Amma heç-heçə bu klubu razı sala bilməz.

Əslində oyun meydan sahibləri üçün yaxşı başladı. Onlar dərhal təşəbbüsə yiyələndi, bir neçə təhlükəli vəziyyət yaratdı və bunun da məntiqi nəticəsi kimi erkən qol vurdu. Qvardiolanın komandası ardından fərqi artırmaq üçün bir neçə əlverişli imkanı boşa verdi. Əvəzində qonaqlar hissənin sonunda nadir əks-hücumların birində bərabərlik qolunu vurdu. MS 2-ci hissənin əvvəlində önə çıxmaq üçün daha bir gözəl imkan qazandı. Ancaq 53-cü dəqiqədə penaltini yerinə yetirən Holann Pikfordla dueldən məğlub ayrıldı. Gözlənildiyi kimi, qalan dəqiqələr də “Siti”nin hücumları şəraitində keçdi, ancaq rəqibin sıx müdafiəsini yarmaq mümkün olmadı. “Şəhərlilər”in çempionatda qələbəsiz oyunlar seriyası 4-ə çatdı, Qvardiola komandanı heç cür böhrandan çıxara bilmir. “Everton” isə ardıcıl 3-cü turda top-klubla heç-heçə etdi.

“Çelsi” ilə “Fulhem”in “Stemford Bric”dəki qarşılaşması sensasiya ilə bitdi. Kim düşünə bilərdi ki, qonaqlar meydandan qələbə ilə ayrılacaq?! Özü də hesabı məhz “zadəganlar”, daha dəqiqi, Palmer açdı. 67-ci dəqiqədə Traorenin əvəzinə meydana çıxan Uilson qonaqları xilaskarına çevrildi. O, 82-ci dəqiqədə hesabı bərabərləşdirməklə komandasını ruhlandırdı. 5-ci uzatma dəqiqəsində isə Muniz “Çelsi”ni şoka saldı. Ədalət naminə deyək ki, bu oyunda qələbəni daha çox haqq edən qazandı. “Fulhem” həm özünə, həm də “Liverpul”a Milad hədiyyəsi verdi.
Düşünmək olardı ki, “Bornmut”la oyundakı fiaskodan sonra MS “Vulverhempton”la oyunda qələbə üçün əlindən gələni edəcək. Amma Amorimin komandası bu dəfə də zəif təsir bağışladı. Fasiləyə qədər meydanda bərabər oyun getdi. Komandalar hücuma hücumla cavab verirdi. 2-ci hissə MY üçün pis başladı – Fernandeş meydandan qovuldu. Meydan sahibləri dərhal fərqlənsələr də, Larsenin qolu ofsayd üzündən sayılmadı. Saatın tamamında Kunya kornerdən topu birbaşa qapıya göndərməklə hesabı açdı. Amorim 15 dəqiqə ərzində 5 dəyişiklik gerçəkləşdirməklə məğlubiyyətdən qurtulmağa çalışdı. Ancaq bu da işə yaramadı. Əksinə, 9-cu uzatma dəqiqəsində Hi Çan Hvan fərqi artırdı. Vitor Pereyranın rəhbərliyi altında ardıcıl 2-ci qələbəsini qazanan “canavarlar” hələ də təhlükəli zonadadı. MY isə son 5 çempionat oyununun dördündə uduzub...

“Liverpul”un növbəti qurbanı “Lester” oldu. Hərçənd qonaqlar oyuna yaxşı başlamışdı. Ayyu 6-cı dəqiqədə əks-hücumu qolla bitirdi. “Tülkülər” bundan sonra dərin müdafiəyə çəkildi. Faktiki qalan vaxt ərzində yalnız “Liverpul” hücum etdi. “Qırmızılar”ın təzyiqi yalnız hissənin sonunda nəticə verdi. Qakpo hesabı bərabərləşdirdi, 2-ci hissə başlayan kimi Cons də qonaqları məyus etdi. Meydanda dominantlığı davam etdirən “qırmızılar” sonda daha bir qol vurmaqla əzmkar qələbə qazandı.

Turun qalan oyunlarına gəlincə, “Nottingem” “Tottenhem”i, “Vest Hem” “Sauthempron”u yeganə qolla məğlub etdi. “Nyukasl” “Aston Villa”nın qapısından üç cavabsız qol keçirdi. Ancaq bu nəticədə Duranın 3-cü dəqiqədə birmingemliləri azlıqda qoyması böyük rol oynadı. “Bornmut”la “Kristal Pelas”, “Brayton”la “Brentford” bir-birinin qapısına yol tapa bilmədi.

18-ci tur
Mançester Siti – Everton 1:1
B.Silva, 14 – Ndiay, 36.
MS: Orteqa, Lüis, Akanci, Qvardiol, Ake (Simpson-Pyuzi, 85), B.Silva, Kovaçiç (Gündoğan, 85), Savinyo, Foden, Dokyu (De Bruyne, 75), Holann.
Çelsi – Fulhem 1:2
Palmer, 16 – Uilson, 82. Muniz, 90+5.
Çelsi: Sançes, Hüsto, Adarabioyo, Koluill, Kukurelya, Kaysedo, Fernandes, Sançes, Palmer, Neto, Cekson (Nkunku, 73).
Vulverhempton – Mançester Yunayted 2:0
Kunya, 58. Hi Çan Hvan, 90+9.
MY: Onana, Yoro (Antoni, 63), Maquayr, Martines, Mazraui, Uqarte (Eriksen, 63), Maynu (Kazemiro, 63), Dalot, Dyallo (Qarnaço, 79), Fernandeş, Heylunn (Zirkzee, 79).
Liverpul – Lester 3:1
Qakpo, 45+1. Cons, 49. Salah, 82 – Ayyu, 6.
Liverpul: Alisson, Aleksander-Arnold, Qomes, Van Diyk, Robertson (Simikas, 86), Qravenberx (Endo, 87), Makallister (Elliott, 90+2), Salah, Cons (Soboslai, 77), Qakpo, Nunyes (Jota, 77).
Nottingem Forest – Tottenhem 1:0
Elanqa, 28.
Tottenhem: Forster, Spens, Drequşin (Bissuma, 87), Qrey, Udoci (Porro, 81), Bentankur (Berqvall, 64), Sarr (Meddison, 64), Conson, Kulusevski, Son Hın Min (Verner, 81), Solanke.
Arsenal – İpsviç 1:0
Haverts, 23.
Nyukasl – Aston Villa 3:0
Qordon, 2. İsak, 59. Joelinton, 90+2.
Sauthempton – Vest Hem 0:1
Bouen, 59.
Bornmut – Kristal Pelas 0:0
Brayton – Brentford 0:0

1. Liverpul 17 13 3 1 40-17 42
2. Arsenal 18 10 6 2 35-16 36
3. Çelsi 18 10 5 3 38-21 35
4. Nottingem F. 18 10 4 4 24-19 34
5. Nyukasl 18 8 5 5 30-21 29
6. Bornmut 18 8 5 5 27-21 29
7. Mançester S. 18 8 4 6 30-26 28
8. Fulhem 18 7 7 4 26-23 28
9. Aston Villa 18 8 4 6 26-29 28
10. Brayton 18 6 8 4 27-26 26
11. Brentford 18 7 3 8 32-32 24
12. Tottenhem 18 7 2 9 39-26 23
13. Vest Hem 18 6 5 7 23-30 23
14. Mançester Y. 18 6 4 8 21-24 22
15. Everton 17 3 8 6 15-22 17
16. Kristal Pelas 18 3 8 7 18-26 17
17. Vulverhempton 18 4 3 11 29-40 15
18. Lester 18 3 5 10 22-40 14
19. İpsviç 18 2 6 10 16-33 12
20. Sauthempton 18 1 3 14 11-37 6

Bombardirlər: Salah (Liverpul) - 16, Holann (MS) – 13, Palmer (Çelsi) – 12, İsak (Nyukasl) – 11.

Turun rəqəmi
100 – Salah premyer-liqada ev oyunlarında vurduğu qolların sayını bu həddə çatdırdı. 100 qoldan 98-i “Enfild”ə, 2-si “Stemford Bric”ə təsadüf edib. 2017-ci ildən “Liverpul”un formasını geyən ulduzun əvvəllər “Çelsi”də 13 oyun keçirdiyini də xatırladaq.

Turun ulduzu
Kodi Qakpo (Liverpul) – niderlandlı futbolçi ilə yanaşı, Salahı da ən yaxşı seçə bilərdik. Sadəcə, Qakponun bu oyundakı statistikası daha yaxşıdı. O, həm qol vurdu, həm də misirlinin fərqlənməsinə şərait yaratdı.

Turun sitatı
Ruben Amorim, MY-nin baş məşqçisi:

Faktlar
* Palmer 2024-cü ildə “Çelsi”nin heyətindı 26-cı qolunu vurdu. 22 yaşlı yarımmüdafiəçi Hasselbeynkin 2001-ci ildə müəyyənləşdirdiyi klub rekordunu (25) yenilədi.
* MS noyabrın 1-dən bəri premyer-liqanın ən pis komandasıdı. “Siti” bu müddətdə 27 mümkün xaldan 5-ni toplayıb. “Şəhərlilər” 9 çempionat oyununun 2-də heç-heçə edib, 1-də qələbə qazanıb, 6-da məğlub olub. Ümumiyyətlə, noyabrın 1-dən bəri bütün turnirlər çərçivəsində keçirilən 13 oyunda yalnız bir qələbə var.
* Fernandeş cari mövsümdə 3-cü dəfə qırmızı vərəqə aldı. 30 yaşlı portuqaliyalı xavbek MY-nin sabiq müdafiəçisi Nemanya Vidiçin 2008/09 mövsümündə müəyyənləşdirdiyi antirekordu təkrarladı.
* “Çelsi” 1999-cu ildən bəri ilk dəfə 82-ci dəqiqəyə qədər öndə olduğu oyundan məğlub ayrıldı. Həmin vaxt “Arsenal”la oyunda eyni ssenari təkrarlanmışdı – 2:3.