Turnir cədvəlinin 8-ci pilləsində qərarlaşan “Neftçi” bu mövsüm üçün hədəflərindən uzaq düşüb və heyətini gücləndirməyə ehtiyac duyur.

“Ağ-qaralar” bu yöndə ilkin addımlar atmağa başlayıb. Onların hədəfinə düşən futbolçu isə “Turan Tovuz”un təcrübəli mərkəz müdafiəçisi Roderik Millerdi.

“Football-plus.az” xəbər verir ki, bu barədə sosial şəbəkələrdə müvafiq məlumatlar yayılır. İddialara inansaq, klub panamalı futbolçu ilə ilyarımlıq müqavilə imzalayacaq. Mümkün transfer xəbərini “Neftçi” azarkeşləri də xoş qarşılayıb. Onlar həqiqətən də Millerin “Neftçi”ni gücləndirəcəyinə inanırlar.

Roderik Miller “Turan Tovuz”un aparıcı legionerlərindən biridi. O, bir çox qollarda və həlledici epizodlarda baş rolda olub. Xüsusən də Misli premyer-liqasının 16-cı turundakı “Şamaxı” ilə matçı qeyd edə bilərik. Millerin təcrübəsi işə yaradı və komandasına 3 xalı qazandırdı. Onun bu bacarıqları “Neftçi”nin diqqətini çəkib.

Xatırladaq ki, Miller 2024/25 mövsümündə 4 qol və 1 məhsuldar ötürmənin müəllifidi.

ƏSƏD SEYİDOV