İngiltərə premyer-liqasında noyabrın ən yaxşıları müəyyənləşib. Hər iki nominasiyanın qalibi eyni klubun üzvləri olub.

Məhəmməd Salah ayın ən yaxşı futbolçusu seçilib.

“Liverpul”un misirli hücumçusu azarkeşlər arasında keçirilən sorğuda qalib gəlib. Salah ayın ən yaxşı oyunçusu adı uğrunda mübarizədə Moyses Kaysedo (Çelsi), Mateus Kunya, Xuan Qomes (hər ikisi “Vulverhempton”), Ceyms Meddison (Tottenhem) və Joao Pedronu (Brayton) arxada qoyub. Xatırladaq ki, Məhəmməd ötən ay premyer-liqada meydana çıxdığı 3 oyunda 4 qol vurmuş və 1 məhsuldar ötürmə vermişdi.

Ötən ayın ən yaxşı məşqçisi üçün ayrılan mükafat isə Arne Slota çatıb. Onun çalışdırdığı “Liverpul” noyabrda keçirdiyi hər 3 oyunda qələbə qazanmışdı. Slotun komandası hazırda premyer-liqada 14 oyuna 35 xalla liderdi.