İngiltərə premyer-liqasında fevralın ən yaxşılarının adına aydınlıq gəlib. Hər iki nominasiyanın qalibi “Mançester Yunayted”in üzvləri olub.

“Football-plus.az” xəbər verir ki, ayın ən yaxşı baş məşqçisi üçün ayrılan mükafata Erik ten Haq layiq bilinib. Onun komandası ötən ay ölkə çempionatında keçirdiyi 4 oyunun üçündə qalib gəlib, bir dəfə isə heç-heçə edib. MY-ni bu mövsümdən çalışdıran Ten Haq premyer-liqada 2-ci dəfə ayın ən yaxşısı seçilib. O, fərdi mükafatı ötən ilin sentyabrında da qazanmışdı.

Markus Reşford isə fevralın ən yaxşı oyunçusu seçilib. 25 yaşlı hücumçu ardıcıl 2-ci, cari mövsümdə 3-cü dəfə bu nominasiyanın qalibi olub. Reşford fevralda meydana çıxdığı 4 matçda 5 qol vurub. O, premyer-liqanın bir mövsümündə ən çox ayın ən yaxşı oyunçusu seçilən “Liverpul”un hücumçusu Məhəmməd Salahın rekordunu təkrarlayıb. Xatırladaq ki, misirli 2017/18 mövsümündə 3 mükafata layiq görülmüşdü.