“Bircə onu deyə bilərəm ki, hesab oyuna görə olmadı. Oyuna yaxşı başladıq. 20 dəqiqə yaxşı futbol oynadıq. İkinci, üçüncü qoldan sonra komandada ruh düşkünlüyü oldu. İkinci hissədə toparlanmaq istədik. Hətta epizodlarımız vardı, geridönüş edə bilərdik. Sadəcə, ruhdan düşmək belə vəziyyətə gətirib çıxardı. Amma belə də gözləmirdik. Yatsaq, yuxumuza da girməzdi ki, belə böyük hesab olar. Sadəcə, rəqibdə hər şey alındı. Bizdə ruh düşkünlüyü oyunumuza əngəl yaratdı. Ona görə də absurd bir nəticə alındı. Düzdü, onların qələbəsinə də kölgə salmaq istəmirəm. Amma aşağı-yuxarı eyni səviyyəli komandayıq. Futboldu, qarşımızda nə qədər oyun var. “Şahdağ Qusar” da fasilədən sonra xal itirə bilər. İkinci dövrədə onlarla cavab görüşümüz də olacaq. Hələ demək olmaz ki, çempionluq əldən gedib. Ümidimizi itirməyəcəyik. Qışdan sonra komandamız daha yaxşı səviyyədə olacaq. Bəzi boşluqlarımız, zədəlilərimiz var. Sonuncu tura kimi döyüşüb-vuruşacağıq. Xeyirlisi nədisə, o olsun. 0:2, 0:3 məğlub olsaydıq, tam başqa ab-hava olacaqdı. Sadəcə, səhvlərimizi təhlil edərək növbəti oyunlara hazırlaşmalıyıq. Qarşıda “Füzuli” ilə oyunumuz var, ona köklənəcəyik. “Füzuli” sabiq komandam olsa da, komandam üçün əlimdən gələni edəcəm. Bombardirliyi kənara qoyuram, əsas qələbədi. Hər oyuna eyni ruhda çıxıram. İnanıram ki, “Şəfa” daha yaxşı nəticələr əldə edəcək”.