Liderlərin fiaskosu - İCMAL
Tur 3 qarşılaşma ilə start götürdü. “Akron”a uduzan “Orenburq”un premyer-liqada məğlubiyyət seriyası 5, qələbəsiz seriyası 16 oyuna yüksəldi.
İlk turda “Spartak” üzrəində qazanılan qələbə hələ də orenburqlular üçün yeganədi! ÇSKA müstəqil Rusiya çempionatı tarixində ilk dəfə evdə ardıcıl 3 oyunda uduzmağa çox yaxın idi. Çünki “Rubin” ikinci hissənin ortalarına qədər “VEB Arena”da iki top fərqi ilə öndə idi. Amma meydan sahiblərinin heyətində sürpriz qəhrəman peyda oldu. “Hərbçilər”in öz yetirməsi olan və buna qədər premyer-liqada keçirdiyi 13 qarşılaşmada qol sevinci yaşamayan 20 yaşlı müdafəçi Lukin birdən-birə dubl etdi! Yenidən yaxşı sürət yığan “Rostov” isə “Nijni Novqorod”u darmadağın etdi.
Bazar günü sürpriz nəticələr qeydə alındı. “Lokomotiv” qapıya 35 zərbə endirərək 2009-dan bəri ən yaxşı göstəricisinə nail olmasına baxmayaraq, evdə iddiasız “Ximki”yə uduzdu. Ötən tur “Spartak” önündə darmadağın olan “Loko” Mixail Qalaktionovun dönəmində ilk dəfə ardıcıl 2 premyer-liqa matçında uduzdusa, “Ximki” tarixində ilk dəfə bu rəqibi mövsümün hər iki oyununda yenməyi bacardı. Ən böyük sensasiya isə “Qazprom Arena”da qeydə alındı. “Zenit” avqustdan bu yana ilk dəfə fərqlənən Qluşenkovun sayəsində erkən qol vurdu və heç nə faciəvi sonluqdan xəbər vermirdi. Amma mövsümü heç də inamlı keçirməyən “Krılya Sovetov” 17-28-ci dəqiqələr aralığında 3 (!!!) qol vurdu. Halbuki “Zenit” 2007-dən bu yana, daha dəqiq desək, premyer-liqada son 265 ev oyununun heç birində fasiləyə qədər 3 top buraxmamışdı. Özü də 2,5 il “Zenit”də oynayan, amma bu kluba və Sergey Semaka lazım olmayaraq “Krılya Sovetov”a qayıdan İvan Sergeyev dubl etdi! “Zenit” qalan vaxtda yalnız fərqi minimuma endirməyi bacardı və mövsümdə ikinci məğlubiyyətlə barışdı. “Krılya” isə 2015-dən bu yana ilk dəfə Sankt-Peterburqda “Zenit”i məğlub etdi. Amma “Zenit”in bu hədiyyəsindən “Krasnodar” yararlana bilmədi. Uzunmüddətli qələbə seriyasından sonra yenidən eniş dönəminə qədəm qoyan Murad Musayevin komandası “Spartak” önündə darmadağın olaraq mövsümdə ilk məğlubiyyətini aldı. Son 5 turda hesabına 15 xal yazan Moskva nəhəngi artıq 3-cü pillədədi. “Krasnodar” 2022-nin iyulundan bəri ilk dəfə evdə böyük hesabla uduzdu. Özü də o vaxt da rəqib “Spartak” idi. Ümumiyyətlə, “Krasnodar”ın indiyə qədər premyer-liqada evdə 6 böyükhesablı məğlubiyyətindən yarısı “Spartak”la oyunlarda qeydə alınıb.
17-ci tur
Zenit – Krılya Sovetov 2:3
Qluşenkov, 4. Alip, 72 – Sergeyev, 17; 28. Oleynikov, 18.
Zenit: Adamov, Mantuan (Sobolev, 64), Nino, Alip (Yeroxin, 82), Santos, Barrios, Vendel (Pedro, 64), Klaudinyo, Qluşenkov (Artur, 82), Mostovoy (Qondu, 46), Kassyerra.
Krasnodar – Spartak 0:3
Uqalde, 17; 28. Barko, 90+3.
Krasnodar: Aqkatsev, Petrov (Smolov, 61), Tormena, Kosta, Olasa, Pina (Krivtsov, 73), Çernikov (Kastanyo, 56), Batçi (Kobnan, 56), Spertsyan, Sa (Qonsales, 61), Kordoba.
Spartak: Maksimenko, Denisov, Duarte, Babiç, Ryabçuk, Umyarov, Prutsev, Barko (Litvinov, 90+5), Bonqonda (Medina, 82), Markinyos (Manqaş, 88), Uqalde.
ÇSKA – Rubin 2:2
Lukin, 63; 90+6 – Daku, 43. Teslenko, 52.
ÇSKA: Akinfeyev, Kellven (Qlebov, 85), Diveyev, Lukin, Moyzes, Kruqovoy (Bistroviç, 70), Pyaniç, Kislyak (Jemaletdinov, 62), Oblyakov, Fayzullayev, Musayev (Quarirapa, 62).
Lokomotiv – Ximki 1:3
Sarveli, 29 – Zabolotnı, 17. Bakayev, 32. Vera, 66.
Lokomotiv: Lantratov, Nenaxov, Nyamsi, Montes, Silyanov, Karpukas (Süleymanov, 46), Barinov, Samoşnikov, Tiknizyan (Saltıkov, 60), Batrakov (Sevikyan, 79), Vorobyov (Sarveli, 46).
Rostov – Nijni Novqorod 4:0
Osipenko, 32; 65. Saravia, 60. Komliçenko, 73-p.
Akron – Orenburq 1:0
Lonçar, 60.
Dinamo Mh – Fakel 0:0
1. Zenit 17 12 3 2 36-10 39
2. Krasnodar 17 11 5 1 34-12 38
3. Spartak 17 10 4 3 33-14 34
4. Lokomotiv 17 11 1 5 33-26 34
5. Dinamo M 16 9 4 3 32-18 31
6. ÇSKA 17 8 4 5 27-14 28
7. Rostov 17 6 5 6 26-27 23
8. Rubin 17 6 5 6 22-24 23
9. Akron 17 5 4 8 20-33 19
10. Krılya Sovetov 17 5 3 9 18-26 18
11. Dinamo Mh 17 3 8 6 9-14 17
12. Nijni Novqorod 17 4 4 9 15-31 16
13. Ximki 17 3 7 7 21-31 16
14. Fakel 17 2 8 7 11-24 14
15. Axmat 16 1 6 9 14-31 9
16. Orenburq 17 1 5 11 16-32 8
Bombardirlər: Uqalde (Spartak) – 14, Batrakov (Lokomotiv) – 10, Daku (Rubin) – 9, Kordoba (Krasnodar), Qluşenkov (Zenit) – 8.
Növbəti turun oyunları dekabrın 7-8-də keçiriləcək: Axmat – Orenburq, Dinamo Mh – Rubin, Spartak – Nijni Novqorod, Dinamo M – Ximki, Krasnodar – Lokomotiv, Fakel – ÇSKA, Rostov – Krılya Sovetov, Zenit – Akron.
Oyundan sonra
Sergey Semak, “Zenit”in baş məşqçisi:
“Sözsüz, bu nəticəni gözləmirdik. Doğma meydanda uduzmaq həmişə üzücüdü. Çox asan qollar buraxdıq. Özümüz isə yaratdığımız fürsətləri qola çevirməkdə çətinlik çəkdik. Hətta 1:3-dən sonra da vəziyyəti dəyişmək üçün əlimizdən gələni etdik. Amma qalan vaxtda fürsətlərdən yalnız birini dəyərləndirdik. Ola bilər ki, bu gün pis oynamadıq. Dediyim kimi yaxşı hücumlarımız, qapıya zərbələrimiz oldu. Amma futbolda əsas nəticədi. Nəticə isə təəssüf ki, xeyrimizə olmadı. Bu duruma düşməmək üçün fürsətlərdən vaxtında yararlanıb qol vurmaq lazımdı”.
Murad Musayev,
“Krasnodar”ın baş məşqçisi: “Oyuna yaxşı başladıq. İki təhlükəli vəziyyət yaratdıq. Amma ilk qolu buraxandan sonra bizə nəsə oldu. Müdafiədən dönən topları götürməkdə çətinlik çəkirdik. Eləcə də bütün hava mübarizələrində uduzurduq. İkinci buraxılan qolda heç nədən topu rəqibə bağışladıq. Qısası, bu oyundan heç də müsbət emosiyalarla ayrılmırıq. “Spartak” bizi üstələdi. Oyun intizamımız əvvəlki matçlardakı kimi deyildi. Birinci qol həlledici oldu. Həmin qoldan sonra özümüzü itirdik. Fiziki cəhətdən yaxşı durumda deyilik? Bəli, sizinlə razıyam. “Spartak” bizi fiziki cəhətdən üstələdi”.
