"Zirə" Misli premyer-liqasının 16-cı tur matçında "Kəpəz"in meydanından böyükhesablı qələbəylə ayrıldı - 4:0.

"Football-plus.az" xəbər verir ki, "qartallar"ın baş məşqçisi Rəşad Sadıqov oyunsonrası mətbuat konfransında jurnalistlərin suallarını cavabladı.

- Oyun gözlənildiyi kimi, çox gərgin və sərt başladı. "Kəpəz"in üzərimizdə təzyiq yaratmağa çalışacağını bilirdik. İkinci hissədə rəqibin təslim olmayacağını təxmin edirdik. Belə də oldu. Azər müəllim çox xarakterli komanda formalaşdırıb. Son turlarda göstərdikləri performans bizi narahat edirdi. Çox vacib qələbə qazandıq. Futbolçularımı təbrik edirəm.

- Tiaqo Silvanın psixoloji durumuyla bağlı narazılıq varmı?
- O, çox yaxşı formadadı. Bir nömrəli qapıçımızdı. İmkanım olsa, "çərçivə"də Silva olar. Aydın da ona göstərilən etimadı doğruldur. Şansından istifadə edir. Bəzi futbolçularla bağlı durum da belədi. Meydana buraxmaq istəsək də, limitə görə alınmır. Futbolçularıma güvənirəm. Elçin uzun müddətdi ki, oynamırdı. Amma iki-üç dəfə meydana çıxdıqdan sonra özünü yaxşı tərəfdən göstərməyə başladı. Taktikamız odu ki, heyətdə 11 dəyişilməz futbolçu olmasın. Komandamızda sağlam rəqabət yaransın.

- Kuboku da saysaq, üç oyunda 11 qol vurmusuz. Kollektiv hücum xəttində fəallıq göstərir. Bunu qoruyub-saxlamaq üçün nə etmək lazımdı?
- Növbəti matçlarda "Turan Tovuz" və "Səbail"lə qarşılaşacağıq. Ümid edirəm ki, həmin oyunlarda da istəyimizə çatarıq. Amma mən fərqli nəsə görmürəm. Sadəcə, yaradılan qol epizodlarından yararlanmağa çalışırıq.

- Zədəli futbolçularınızla bağlı son durum necədi?
- Ümid edirəm ki, Utziq qış fasiləsinə qədər 20-30 dəqiqə oynayar. Rüstəm gələn ildən meydana çıxacaq. Qismət və Məqsədin də tezliklə sağlamlığına qovuşacağına inanırıq.

KƏNAN BAHADIR