FİFA Rusiyanın iki təmsilçisi - ÇSKA və ''Ximki''yə 2026-nın yayına qədər transfer qadağası qoyub.

''Hərbçilər'' Çidera Ejukeni 2020-ci ildə ''Herenven''dən 11,5 milyon avroya transfer etmişdilər. Bu məbləğin 3,1 milyon avro su hələ də ödənilmədiyindən niderlandlılar FİFA-ya şikayət etmişdilər. ''Ximki'' isə isveçli yarımmüdafiəçi Besard Saboviçə olan borcu üzündən bu cəza ilə üzləşib. Əslində ÇSKA-nın özünün də Nikola Vlaşiçin satışından sonra ''Vest Həm''dən 20 milyon avro alacağı var. Amma bilindiyi kimi Ukraynaya hərbi təcavüz üzündən Rusiya yığması və bu ölkənin klubları beynəlxalq yarışlardan kənarlaşdırılıb. Bu qərardan sonra transferlər zamanı Avropa klubları üçün Rusiya klublarının hesabına pul köçürmək çətinləşib. Eləcə də məhz buna görə ÇSKA 3,1 milyon avronu Niderland klubuna köçürə bilməyib.

Üç klub arasındakı anlaşmaya görə ÇSKA-nın ''Herenven''ə olan borcunu ''Vest Hem'' ödəməli idi. Amma ingilislər bundan boyun qaçırdığından ''Herenven'' də haqlı olaraq FİFA-ya şikayət edib. ÇSKA-nın rəsmisi Kirill Breydonun sözlərinə görə narahatlığa əsas yoxdu. O bildirib ki, pulun ödənilməsi üçün FİFA ÇSKA-ya ayyarım vaxt verib. Cari mövsümün qış transfer dönəmi açılana qədər məbləğ ödənilsə, qadağa aradan götürüləcək.

ƏLİ