Fransalı forvard Jan-Kevin Oqyusten sabiq klubu ''Lids''dən 24,5 milyon funt sterlinq təzminat ala bilər.

"Football-plus.az" xəbər verir ki, bu, FİFA-nın qərarıdı.

Yaxın keçmişdə ən istedadlı oyunçulardan sayılan Oqyustenin hazırda 25 yaşı var və o, ''Bazel''in şərəfini qoruyur. ''Lids'' bu oyunçunu 2020-nin yanvarında ''Leyptsiq''dən icarəyə götürmüşdü.

Bu klubda özünü göstərə bilməyərək cəmi 3 rəsmi oyuna çıxan futbolçu həmin ilin iyulun əvvəllərində Almaniya klubuna qayıtmışdı. Sonradan məlum olmuşdu ki, müqavilədə xüsusi maddə var idi.

Həmin maddəyə görə ''Lids'' elitaya yüksələcəyi təqdirdə Oqyusteni daimi əsasda transfer etməyə məcbur idi. Belə də oldu və ''Lids'' 2019/20-nin nəticələrinə görə premyer-liqaya yüksəldi. Həmin yay bilindiyi kimi pandemiya üzündən mövsüm gec başa çatmışdı. İngilislər də bu məqamı əllərində bayraq edirdi. Onlar iddia edirdi ki, müqavilənin müddəti iyunun 30-da başa çatmalı idi. ''Lids'' elitaya vəsiqəni isə iyulun 17-də rəsmiləşdirmişdi. Amma həm FİFA, həm də İdman Arbitraj Məhkəməsi ''Leyptsiq''in tərəfini tutunca ''Lids'' almanlara 15,5 milyon avro təzminat ödəməli olmuşdu.

Bu dəfə isə Oqyusten özü FİFA-ya şikayət etdi və qurum onun haqlı olduğuna qərar verdi. ''Lids'' Oqyustenə onun beşillik məvacibini, yəni 24,5 milyon funt sterlinq ödəməli olacaq. Amma ingilislər bu dəfə də qərarla razılaşmayaraq məsələni Arbitraj Məhkəməsinə daşıyıblar