Qvineya futbolunda faciə baş verib. Bu ölkədə keçirilən matçda onlarla azarkeş həlak olub...

Afrika ölkəsinin ikinci böyük şəhəri olan Nzerekoredə keçirilən matçda eyniadlı yerli komanda ilə “Labe” qarşılaşıb. Matç Qvineya üsyançılarının lideri polkovnik Mamadi Dumbuyanın şərəfinə keçirilən turnirin finalı olub. Lakin həlledici oyun böyük faciə ilə nəticələnib.

Yerli mənbələrin məlumatına görə, insidentə hakimin yerli komandanın oyunçusuna qırmızı vərəqə göstərməsi və daha sonra qapısına penalti təyin etməsi səbəb olub. Yerli azarkeşlər penalti qərarı veriləndən sonra rəqib həmkarlarının üzərinə hücum çəkiblər. Qarşıduran tərəflər hətta bir-birini daşa basıblar. Nəticədə fanatlar arasında kütləvi dava-dalaş yaranıb. Polis onları ayırmaq üçün gözyaşardıcı qazdan istifadə edib. Bu zaman azarkeşlər stadiondan qaçmağa başlayıblar və arenanın çıxış qapılarının qaşısında sıxlıq yaranıb. Bəziləri basırıq nəticəsində boğularaq və ya küçəyə çıxmaq istəyərkən stadionun divarlarından tullanaraq ölüb. Həkimlərdən birinin sözlərinə görə, hadisə nəticəsində 100-ə yaxın insan həlak olub. Bir sözlə,cəsədlər yerli xəstəxana və meyitxanaları doldurub.

Qvineyanın baş naziri Amadu Uri Ba bu hadisəyə görə ölkə ictimaiyyətinə başsağlığı verib. Dövlət rəsmisi əhali arasında sakitliyi təmin etmək üçün müvafiq orqanların səylə çalışdıqlarını bildirib.