Cəbəllütariq, Lixtenşteyn, Malta, Andorra, Litva və …Azərbaycan. Millətlər Liqasının yeni mövsümündə D liqasında məhz bu komandalar mübarizə aparacaq.

Turnirin əsas sensasiyası olan San Marino yığması isə ən azı bir mövsüm orda olmayacaq. FİFA reytinqində ən aşağı pillədə (210) qərarlaşan komanda Lixtenşteyni iki dəfə məğlub etməklə (1:0 və 3:1), eləcə də Cəbəllütariqdən 1 xal almaqla (1:1) C liqasıyan yüksəldi.

“Cırtdan ölkə”nin yığması bu uğura çatana qədər xeyli rekord yenilədi. Yaxınlarda rəsmi oyunlarda ilk qələbəsini qazanan San Marino (5 sentyabr. Lixtenşteyn – 1:0) 2,5 aydan sonra eyni rəqibi yenə məğlub etdi. Ümumiyyətlə, Lixtenşteyn San Marinonun “sevimli” rəqibidi. 20 il əvvəl yoldaşlıq oyununda da üstün olmuşdu. San Marinonun tarixində yalnız bu üç qələbə var.

Son 3:1 San Marino yığmasının tarixindəki ilk səfər qələbəsidi. Bu komanda indiyə qədər 101 dəfə səfərdə, iki dəfə neytral meydanda oynamış, 4 ev oyununu da İtaliyada keçirmişdi, ancaq heç vaxt ölkənin hüdudlarından kənarda qələbə qazanmamışdı. Nəhayət, bu seriyaya son qoyuldu.
San Marino tarixində ilk dəfə bir oyunda 3 qol vurdu. 2003-cü ildə Lixtenşteynlə oyun heç-heçə (2:2) bitmişdi, 2012-də Maltaya 2:3 uduzmuşdular. Özü də 3:1 komandanın ilk əzmkar qələbəsidi.

San Marino məhz bu il Millətlər Liqasında ilk qolunu vurdu. Tarixi qol 19 yaşlı Niko Sensolinin hesabındadı, məhz o, Lixtenşteynin qapısından qələbə topunu keçirmişdi.
Nikole Nanni də ciddi uğura nail olub. O, ardıcıl iki oyunda fərqlənən yeganə yığma üzvüdü, Cəbəllütariqlə Lixtenşteyni (yenə də bu yığma yağ olsun!) məyus edib. Nəticədə San Marino tarixində ilk dəfə Millətlər Liqasında finişə müsbət top fərqi ilə çatıb. Və daha bir məqam: San Marino təkcə tarixində ilk dəfə qrupu zirvədə bitirmədi, həm də bu turnirdə ilk dəfə kimisə qabaqladı.

2024 yığma tarixinin ən uğurlu ilidi. Rəsmi oyunlarda ilk dəfə müsbət statistika qeydə alınıb – iki qələbə, heç-heçə və məğlubiyyət. San Marinonun yetərincə gənc yığması var: orta yaş 23-dü. Deməli, bu “qızıl nəsil” irəlidə yeni-yeni uğurlar qazana bilər.