Noyabrın 25-də saat 13.00-14.00 aralığında Misli premyer-liqasında növbəti, daha dəqiq desək, mövsümün beşinci məşqçi istefası reallaşdı. Söhbət “Sabah”dan gedir ki, Masazır təmsilçisi Krunoslav Renduliçə qapını göstərdi. Əslində klub rəhbərliyi bu qərar üçün çox gecikdi. Klub büdcəsinə, heyətinin kəmiyyət və keyfiyyət göstəricilərinə görə ölkə miqyasında ilk “üçlük”dədisə, turnir cədvəlində də ən azı “avrokubok zonası”nda olmalıdı. Bu, getdikcə qəddarlaşan futbol aləminin əsas tələblərindəndi.

Bilindiyi kimi, “Sabah” son 7 turda qələbəyə həsrət qalıb. “Bayquşlar” belə biabırçı gündədisə və vəziyyətdən çıxış yolu tapmaq istəyirsə, təcrübəli, titullu, müəyyən səviyyədə ünlü baş məşqçiylə anlaşmalı və konkret tələblər əsasında müqavilə imzalamalıdı. Bəli-bəli, belə düşünürdüm. Amma Renduliçin boş qoyduğu oturacaq hələ soyumamışdı ki, yeni təyinat açıqlandı. İstefadan təxminən 3 saat sonra. Başqa sözlə, əqrəblər 17.00-ı göstərirdi. Bəli-bəli, “Sabah” müqəddəratını təhvil verəcəyi mütəxəssisi cəmi üç saat ərzində seçdi. Təbii ki, ağla seçimin əvvəlcədən edilməsi ehtimalı gəlir. Amma axı “bayquşlar”ın “Turan Tovuz”la heç-heçə etməsinin üzərindən 20 saat keçməmişdi. Hörmətli “Sabah” rəhbərliyi, deməyin ki, gecə yuxumuza haram qatıb baş məşqçi postuna yeni namizədlə danışıq apardıq. Vallah, belədə təcrübənizə inam azalar. Təbii ki, Vasili Berezutskini aşağılamağa çalışmıram. Sadəcə, gənc mütəxəssis daha öncə Niderlandın “Vitess” (2018-19), Rusiyanın ÇSKA (2020-21, 2022), “Krasnodar” (2021-22), həmçinin Çinin “Şanxay Şenxua” (2023-24) klublarında köməkçi məşqçi kimi fəaliyyət göstərib. Moskvanın ÇSKA klubunda idman əlaqələndiricisi olub (2020). Futbolçu kimi Rusiyanın “Torpedo-ZİL” və ÇSKA klublarında çıxış edib. Rusiyanın əsas yığmasında 101 oyun keçirib (5 qol). Axı Berezutskinin baş məşqçi kimi təcrübəsi yoxdu. Bəlkə də seçim qısa müddətdə edilməsə, daha uyğun baş məşqçi tapılardı. Belə deyilmi?

Biz hər ehtimalı nəzərə alıb, “Sabah”ın mətbuat xidmətinin rəhbəri Elnur Həmidova bu suallarla müraciət etdik: Krunoslav Renduliçin vəzifəsindən ayrılması haqda qərarla nəticələnən klubdaxili iclas nə vaxt keçirilib? Vasili Berezutskiylə danışıqlara nə vaxt start verilib? Onun qarşısına hansı hədəflər qoyulub?

Klub rəsmisini dinləyək: