“İsveçlə oyunda qələbə qazanacağımıza inanmırdım. İkili mübarizələrdə çox aciz görünürdük. Fərdi səhvlərə həddən artıq çox yol verdik. Qapımızda qollar gördüyümüz epizodlarda rəqibin üzərinə getmək əvəzinə geri çəkilirik. Bəhlul və Rza fərdi səhvlərə yol verdi. Rza yaxın küncə yıxılır, uzaq küncü buraxır. Belə səhvlər də oldu. 5 müdafiəçi ilə oynamaq özünü doğrultmadı. Mənə elə gəlir ki, başqa strategiya seçmək lazım idi. Meydanın mərkəzində hər şeydə rəqibə uduzduq. Bu azmış kimi, cərimə meydançasının içində də uduzduq. Bütün bunların hamısı darmadağına gətirib çıxardı. İkili mübarizələrdə aciz qalmağımız onu göstərirdi ki, fiziki baxımdan hələ hazır deyilik. Zamiqin səhvindən, ümumiyyətlə, danışmıram. Gəncləri meydana buraxmaq, heyəti cavanlaşdırmaq yaxşıdı. Amma birdən-birə də olmaz. Heç oynamayan bir oyunçunu belə durumda müdafiənin mərkəzinə buraxmaq riskli oldu. Hamının günahı var. AFFA-nın nə qədər günah payı olduğunu bilmirəm. Hər şeyə cavabdehdi deyə, AFFA da müəyyən pay sahibidi. Bu duruma düşməyimizin səbəbkarı futbol ictimaiyyətidi. Futbol ictimaiyyətində kimlər varsa, - AFFA, sizli-bizli - hardasa səhvə yol vermişik”.