Bilindiyi kimi, yığmanın bugünkü matçında ədaləti Pavel Raçkovski təmsil edəcək. Yığmamız polşalı referinin idarəçiliyi altında baş tutan oyuna yalnız qələbə qazanmaq üçün çıxacaq ki, C liqasında qalmaqla bağlı cüzi şanslarından yararlana bilsin.

Bəs Raçkovski kimdi? Öyrənmək üçün qəzetimizin ənənəvi hakim təqdimatına keçid alaq.

Polşalı referi karyerasına ölkəsinin aşağı liqasında başlayıb. Burda 30 matç idarə edəndən sonra elita klublarının yarışında şans qazanan “fit sahibi”nin bacarıqları FİFA-nın da diqqətindən yayınmayıb. Beləliklə, Raçkovski 2013-cü ildən bəri beynəlxalq oyunlara təyinat almağa başlayıb. Amma hələ ölkə daxilindəki karyerasına nəzər salaq.

Raçkovski Polşanın əsas çempionatında ilk görüşünü 2010-cu ildə keçirib. O indiyə qədər bu çərçivədə 331 qarşılaşma idarə edib ki, 1550 sarı, 71 qırmızı vərəqə göstərib. Vaxtilə ona Yunanıstan Futbol Federasiyası da güvənib və bir superliqa matçının idarəçiliyində xidmətindən yararlanmağı lazım bilib. Xatırlayırsızsa, ötən ilin mayında məhz Raçkovskinin rəhbəlik etdiyi hakimlər briqadası alkoqol qəbulu iddiası ilə son anda AEK – “Aris” oyununun idarəçiliyindən kənarlaşdırıldı. Hətta bu üzdən UEFA prezidenti Aleksander Çeferin Yunanıstan Futbol Federasiyasına xəbərdarlıq məktubu göndərərək elit və A kateqoriyalı hakimlərin Yunanıstan çempionatında oyun idarə etməyəcəyini bildirdi. Nəticədə dəfələrlə bu ölkədə meydana çıxan Əliyar Ağayev də qadağayla üzləşdi. Yəni sözügedən hakimlə ilk tanışlığımız xoşagələn tərzdə deyil. Qeyd edək ki, Raçkovski Çexiya, Səudiyyə Ərəbistanı və İsveçrə kimi ölkələrin çempionatlarında da iş başında olub.

Beynəlxalq sınaqlarına gəlincə, ilk dəfə 17 yaşadək futbolçuların Avropa çempionatının seçmə mərhələ oyununda ədaləti təmsil edən Raçkovski daha sonra Çempionlar, Avropa, Konfrans, Gənclər və Millətlər Liqalarında, həmçinin 19 və 21 yaşadək futbolçuların AÇ matçları və beynəlxalq yoldaşlıq oyunlarında görünüb. Ümumiyyətlə, Raçkovski indiyə qədər 487 matç idarə edib, 2274 sarı, 109 qırmızı vərəqə göstərib.

KƏNAN BAHADIR