Millətlər Liqasında noyabrın 16-da evdə Uels, noyabrın 19-da səfərdə Monteneqro ilə qarşılaşacaq Türkiyə yığmasında iki zədəli futbolçunun adı heyətdən çıxarılıb.

Söhbət ''Fənərbaxça''lı Çağlar Söyüncü ilə ''Brayton''lu Fərdi Kadıoğludan gedir. Son turda ''Sivasspor''la qarşılaşmanın artıq 12-ci dəqiqəsində zədələnərək əvəzlənən Çağların sol dizində problem aşkarlanıb. Onun təxminən 1 aylığa sıradan çıxdığı güman edilir. Fərdinin isə sol ayağının baş barmağı qırılıb. 25 yaşlı futbolçu zədə üzündən ''Mançester Siti''yə qarşı son matçı buraxmalı olmuşdu. Kadıoğlu bazar günü ''Fənərbaxça'' - ''Sivasspor'' qarşılaşmasını sürpriz şəkildə tribunadan təqib etmişdi.

''NTV''nin məlumatına görə Fərdi əməliyyatsız müalicə üsulunu seçsə, yaşıl meydanlara 2 aydan tez dönə bilməyəcək. Amma əməliyyat olunacağı halda o bir aya sağala bilər. Bu oyunçulardan başqa zədə üzündən ''Fənərbaxça''lı Aleksander Cikunun adı Qana, ''Qalatasaray''lı İsmael Yakobsun adı Seneqal, ''Beşiktaş''lı Milot Raşitsanın adı isə Kosovo yığmasının heyətindən çıxarılıb.

ƏLİ